Këtë të hënë do të mblidhet Kuvendi. Në rendin e ditës është miratimi i buxheti. Ndërkohë, opozita ka paralajmëruar se do të tentojë të bllokojë sërish seancën plenare.
Deputetët demokratë janë angazhuar në bllokimin e punimeve të Kuvendit pasi shprehen se të drejtat e tyre po shtypen nga mazhoranca. Sipas opozitës, në mënyrë antikushtetuese, PS po pengon ngritjen e komisioneve hetimore të kërkuara nga PD si dhe po tenton të ‘përcaktojë’ opozitën duke refuzuar ndryshimet në komisionin e posaçëm të reformës zgjedhore.
Kuvendi është parashikuar që të nisë në orën 10:00 në një seancë maratonë ku do të diskutohet dhe miratohet buxheti i vitit 2024, ndërkohë që opozita e ka kundërshtuar këtë buxhet. Nga PS ndërkohë, është bërë me dije se buxheti mund të kalojë edhe pa debat parlamentar siç ka ndodhur në seancat e fundit.
Nga ana tjetër, ka pasur zëra se në rast se opozita vendos të ngujohet në sallën e Parlamentit, ekziston mundësia që seanca të zhvendoset në ambientet e Kryesisë së Kuvendit.
