Një aksident ajror u regjistrua këtë të diel në Australi, ku dy avionë të vegjël u prekën teksa fluturonin pranë njëri-tjetrit në gjirin e portit Victoria.
Kamerat kanë filmuar momentin kur dy avionët prekin krahët në ajër, teksa njëri prej tyre humbi kontrollin dhe përfundoi në det, teksa tjetri u ul me sukses në në aeroportin Essendon. Autoriteti australian i sigurisë detare tha se në aksident ishin përfshirë dy avionë Viper S-211.
Duke ngritur alarmin, piloti i avionit që mbeti në ajër pas aksidentit, kërkoi ndihmë në radio. Ekipet e kërkim-shpëtimit kanë nisur menjëherë operacioni për gjetjen e dy personave që udhëtonin në aeroplanin e vogël, në një zonë detare ku janë gjetur mbetje të tij.
Byroja australiane e sigurisë në transport tha se do të niste një hetim për aksidentin ndërkohë që i ka kërkuar të gjithë personave që mund të kenë qenë dëshmitarë apo të kenë foto të aksidentit, të kontaktojnë për të dhënë informacione.
