Emisioni “Fiks Fare” denoncoi mbrëmjen e së martës një skandal me tjetërsimin e pronave në bregdetin e Kavajës.
Në internet gjen me dhjetëra njoftime për shitje prone në një nga plazhet me të bukura dhe virgjëra të Shqipërisë, në zonën e “Gurit të Lëmuar” që është mes Plazhit të Gjeneralit dhe Plazhit të Spillesë. Zona është nën administrim nga Bashkia e Rrogozhinës. Pronat janë parcelizuar në pjesë të vogla dhe kanë dalë në treg. Disa kohë më parë, Prokuroria e Kavajës ka dënuar disa zyrtarë vendorë dhe të Kadastrës për prona të ngjashme, por sërish vijon fenomeni, teksa rëra dhe gurët janë bërë “tokë bujqësore”.
Grupi i Fiks Fare udhëtoi në atë zonë, i cili është në mes të Spillesë dhe Plazhit të Gjeneralit. Pak vite më parë, zona e pyllëzuar dhe rëra në Spille është hetuar nga Prokuroria e Kavajës pasi është ndarë me ligjin 7501. Disa zyrtarë, duke përfshirë zyrtarë të Kadastrës së Kavajës, janë arrestuar. Gjithashtu janë ndaluar dhe hetuar dhjetëra shtetas të cilët kanë falsifikuar dokumentet e pronës, pra të zonës së pyllëzuar.
Këta persona u arrestuan, proceduan e madje u dënuan nga Gjykata e Kavajës në lidhje me tjetërsimin e asaj prone shtetërore.
Pylli dhe rëra në Spille u bë tokë bujqësore!
Fiks Fare ka siguruar vendimin e gjykatës, i cili hedh dritë mbi një nga aferat më të mëdha të tjetërsimit të pronës publike. Bëhet fjalë për zonën me pisha dhe në breg të detit në plazhin e Spillesë. Vendimi i Gjykatës së Kavajës është dhënë në datën 10 prill 2019, për 9 të pandehur për shpërdorim detyre dhe falsifikim dokumentesh. Në vendim thuhet shprehimisht se “nga hetimit e kryera ka rezultuar se në kundërshtim me ligjin është bërë tjetërsimi i parcelave shtetërore ranishte edhe pyll, përgjatë bregut të detit në zonën e plazhit Spille”.
Madje, kallëzim ka bërë edhe Komanda e Forcës Ajrore, pasi “Poligonit të Qitjes” në Rreth Greth të Kavajës i kishte dalë pronari! Në vendim shkruhet se pylli me pisha në breg të detit u bë tokë arë! Këto parcela janë tjetërsuar nga persona të tretë nëpërmjet shitblerjeve apo akt dhurimeve të ndryshme. Veprimet i kanë ligjëruar ish-drejtuesit e Kadastrës së Kavajës, teksa kthyen zonën “pyll” dhe “ranishte” në “tokë arë”. Në fund, Gjykata e Kavajës i ka gjetur fajtorë dhe i ka dënuar nga 2 deri në 3 vite burg.
Ndërkohë që vetëm pak metra larg nga ai truall, një tjetër zonë, pra zona e “Gurit të Lëmuar” ku jemi ne aktualisht, është ndarë po me ligjin 7501. Zona e pyllëzuar, në bregdetin Adriatik, sipas dokumenteve që disponon Fiks Fare është ndarë me ligjin 7501. Pra, e gjithë kjo zonë është konsideruar si arë. Hetimet në atë kohë janë ndalur vetëm në Spille, ndërkohë që Guri i Lëmuar është lënë në këtë gjendje.
Tokë arë në breg të detit, njoftimet për shitje në internet
Emisioni Fiks Fare ka mësuar se pronat në këtë zonë vijojnë të shiten. Pronat janë ndarë në parcela të vogla, nga 500, 100, 1500 dhe maksimumi 2000 metër katrorë dhe po shiten te Agjencitë Imobiliare. Disa nga këto agjenci kanë njoftuar për shitje toke te Guri i Lëmuar.
Fiksi bëri një vëzhgim të thjeshtë në internet, ku u gjetën dhjetëra njoftime për shitje trualli në zonën e ‘Gurit të Lëmuar”. “Okazion, 700 m2 tokë, 83 metra larg detit te Guri i Lëmuar me një çmim 59 mijë euro. Në mes të plazhit të Gjeneralit dhe Spillesë, i njohur për bregdetin e mrekullueshëm të kombinuar ranor dhe shkëmbor. Akses në rrugë. Me certifikatë pronësie” ishte një nga njoftimet, i cili ishte i shoqëruar edhe me vendosjen në hartë, shumë afër detit!
Ndërkohë, njoftimi i radhës; “Tokë 400 m2 për shitje buzë plazhit në Spille me vlerë 55 mijë euro. Vetëm 10 metra larg nga deti”. Pra, zonë ranore. “Parashikohen komplekse hoteliere. Toka ka dokumentacion të rregullt” vijonte njoftimi. Një tjetër ishte për një sipërfaqe 1000 m2 me vlerë 40 mijë euro. Bashkëlidhur njoftimit, ishte vendosur edhe certifikata e pronësisë dhe vendndodhja. Sërish, shumë afër bregut të detit! Të tilla njoftime gjen me dhjetëra në internet. Nga agjenci apo edhe individë, të cilët kanë publikuar edhe certifikatat e pronësisë.
Fiksi te Guri i Lëmuar: Pronat në shitje janë shkurre, zaje dhe rërë
Fiksi shkoi te disa nga këto zona për të parë se çfarë po shitje; arë, truall apo kanë emërtime të tjera. Një nga vendet që doli në shitje ishte një zonë me shkurre. E gjithë kjo zonë është parcelizuar nga të dyja anët e rrugës. Madje edhe pjesa me shkurre e cila është ndarë me ligjin 7501. Nga pamja rezulton se këto prona nuk kanë qenë asnjëherë tokë bujqësore dhe megjithatë janë ndarë në mënyra të dyshimta. Por, nga ajo që konstatoi Fiksi rezulton se shitësit janë dora e dytë, e tretë e me radhë. Ndërkohë edhe një shesh, buzë detit, kishte pronar. Trualli ishte me rërë dhe zaje deti, ndërkohë që ishte rrethuar dhe bërë gati për ndërtime.
Pas vëzhgimit në internet, gazetarët e Fiks Fare kontaktojnë disa nga numrat që shesin këto prona. Fillimisht, kontaktojmë për pronën 700 m2, e cila shitej në një agjenci në qytetin e Kavajës. “Ne këtë (700 m2) e patëm marrë atëherë, ishte me certifikatë me të gjitha, por problemi ishte që nuk u ndërtonte dot! Ndërsa kjo (1500 m2) është toka e fundit ku mund të ndërtohet. Nuk e di kështu si zonë e mbrojtur ose do të ndërtohet ndonjë resort ndonjë gjë. Besoj se për resorte për kështu. Ndërsa pjesa këtej është kështu është më kollaj për t’u ndërtuar. Kjo është fiks mu buzë rrugës, sa zbret poshtë”- thotë agjenti, teksa shton se pronat janë me certifikata të rregullta pronësie. “Aty ndërtohet. Më e kollajshme është të ndërtohen kështu shtëpia druri”- pohon ai. Agjentët imobiliarë i dërgojnë Fiksit edhe një certifikatë pronësie. Bëhet fjalë për një pronë 1500 m2 në fshatin Domen. Lloji i pasurisë është “arë”. Pra, tokë bujqësore.
Agjencitë: Pronat janë me certifikata të rregullta pronësie
Gazetarët e Fiksit kërkojnë për të tjera prona në atë zonë. Kush po i shet dhe a kanë dokumente të rregullta pronësie?! Agjentët pohojnë se zona afër detit është natyrore. “Edhe këtë që patëm ne ishte me certifikatë, po kishin shumë njerëz që donin ta blinin po pastaj kur morën vesh këtë u tërhoqën të gjithë dhe e hoqëm fare. Është shumë e vështirë për të ndërtuar. Pastaj varet me ryshfete se si mund të bëhet” – thotë ai. Më tej tregon se në atë zonë duan të ndërtojë qeveritarë. “Kam nja dy informacione më shumë, zona këtu ata e bënë për vete a e kupton?! Ndërkohë që s’të lënë shumë që të futesh. Në të gjithë këtë zonën afër detit ata do të bëjnë resorte dhe gjëra me aq sa po dëgjojmë. I rregullojnë vetë ata. Se janë po këto vetë domethënë. Janë këta të qeverisë vetë! Sipas ça flitet domethënë dhe e lënë zonë të mbrojtur që ta ndërtojnë vetë. Është folur aty për resort. Këtu kanë filluar të blejnë edhe te pjesa sipër se e kanë dëgjuar kështu që do marri zhvillim dhe po pyesim shumë edhe për pjesën sipër” – thotë agjenti.
Bashkia e Rrogozhinës: Zonë Natyrore, nuk lejohen ndërtime
Por, a lejohet të shiten apo të ndërtohet në atë zonë?! Fiksi u interesua te Bashkia e Rrogozhinës, në Zyrën e Urbanistikës. “Aty është tokë bujqësore dhe janë vetëm ato ndërtime që nuk bien ndesh me Urbanistikën. Pra magazina, ndonjë dyqan shitje, këto që përmenden te rregullorja e Urbanistikës” thotë drejtori i Urbanistikës. Më tej pohon se “nëse miratohet ndonjë Agro-Turizëm mund të bësh ndonjë bujtinë”. Fiksi e pyet se në atë zonë janë ndërtuar. “Duhet të flasim me rregullore, jo se ça bëhet. Sa ka qenë rregullorja në fuqi i bie që janë pa leje. Nëse i kanë bërë përpara se kjo të hynte në fuqi, nuk e di se çfarë kanë bërë me rregulloret e vjetra”- pohon ai, teksa thotë se te Zona Natyrore mund të bësh ndërtime 3 mujore.
