Në Grupin E, në momentin e hedhjes së shortit, e sigurt është se në radhët e Polonisë dhe Republikës Çeke, ishin optimistë pasi goglat i vendosën rivalë si Shqipëria, Moldavia dhe Ishujt Faroe, por dy xhiro përpara fundit, Polonia dhe Çekia, e shohin veten me një këmbë jashtë.
Në këto kualifikuese Shqipëria i mori 3 pikë Polonisë dhe 4 pikë Çekisë, ndërsa të premten përballen me Moldavinë, një kundërshtar që po ashtu është në lojë për një biletë, një kundërshtar që nuk ka pësuar asnjë humbje në shtëpinë e tyre dhe vetëm Shqipëria i ka mposhtur.
Padyshim, Moldavia nuk është një rival komod, këtë e ka treguar gjatë këtyre kualifikueseve. Edhe në sfidën e parë në “Air Albania”, Shqipëria vuajti pavarësisht fitores 2-0 me golat e Jasir Asanit dhe Nedim Bajramit.
Historia ka treguar se Moldavia është një “pre” e preferuar për Shqipërinë. Në 6 përballjet ndërmjet tyre, Shqipëria ka fituar 5 sfida dhe vetëm një prej tyre ka përfunduar në barazim pa gola.
Besojnë shumë te suksesi i kuqezinjve edhe kompanitë e basteve, një fitore e mundshme e Shqipërisë vlerësohet me 1.80.
