Policia e Vlorës ka proceduar penalisht administratorin e televizionit lokal ” 6+1 Vlora”, shtetasin Albert Deliaj, 57 vjeç, pas kallëzimit të gazetares Afrovita Hysaj, se është kanosur me fjalë nëpërmjet telefonit prej tij.
Albert Deliaj i ka dërguar një mesazh në telefon gazetares Afrovita Hysaj, ku i shkruan “Je në gjak me mua”.
Gazetarja zbardhi detaje të reja rreth ngjarjes së rëndë të përdhunimit të 26-vjeçares në Vlorë, e cila u përdhunua në grup nga tre persona në hotel, pasi e kishin droguar dhe më pas e braktisën në rrugë në gjendje të rëndë për jetën dhe duke shkumëzuar nga goja.
Lidhur me këtë ngjarja gazetarja Afrovita Hysaj, referuar edhe burimeve pretendon se përveç shtetasve Oltjan Tahiri, 31-vjeç, Albi Ceno 28-vjeç dhe Gentjano Mehmeti, 32-vjeç, ka qenë dhe një person i katërt. Sipas saj, motrat e dy prej autorëve të dyshuar janë drejtoresha në administratë. Ndërsa një e tretë është drejtuese e televizionit lokal 6+1 Vlora.
Kjo deklaratë duket se ka irrituar drejtuesit e televizionit në fjalë, që kanë reaguar edhe me një artikull jashtë çdo norme duke sulmuar gazetaren Hysaj. Në artikullin e televizionit lokal, gazetarja etiketohet me termin e rëndë “prosti”, teksa e akuzojnë se po mundohet të përfshijë padrejtësisht këtë televizion në ngjarje.
Njoftimi i Policisë:
“Specialistët për Hetimin e Krimeve në Komisariatin e Policisë Vlorë kanë referuar materialet në Prokurori dhe u procedua në gjëndje të lirë, për veprën penale “Kanosja”, shtetasi A. D., 57 vjeç, banues në Vlorë pasi:
Shtetasja A. H., 34 vjeçe, banuese në Vlorë, me profesion gazetare, ka kallëzuar se është kanosur me fjalë nëpërmjet telefonit, nga ky shtetas, për shkak të një lajmi që ajo ka publikuar, lidhur me rastin e 26-vjeçares nga qyteti i Vlorës, e cila dyshohet se është nxitur të përdorte lëndë narkotike nga disa shtetas, 3 prej të cilëve më pas dyshohen se kanë kryer marrëdhënie seksuale me dhunë me të.
Gjithashtu në vijim të njoftimit të dhënë më datë 22.10.2023, për vënien në pranga të 2 shtetasve dhe shpalljen në kërkim të një shtetasi tjetër, të cilët dyshohen se në bashkëpunim me njëri-tjetrin, kanë kryer marrëdhënie seksuale me dhunë me një 26-vjeçare, të cilën paraprakisht e kanë nxitur të përdorë lëndë narkotike, sqarojmë se:
Specialistët për Hetimin e Krimeve të Komisariatit të Policisë Vlorë, në drejtimin e Prokurorisë, kanë vijuar hetimet e thelluara për këtë rast.
Në vijim, janë referuar materialet në Prokurori, për veprën penale “Nxitja për përdorimin e drogës”, edhe për shtetasin V. K., 36 vjeç, banues në Vlorë, dhe vijon puna për kapjen e tij.
Ky shtetas dyshohet se ka bashkëpunuar me shtetasit O. T., A. C. dhe G. M., për të nxitur 26-vjeçaren që të konsumojë lëndë narkotike.
Materialet iu referuan Prokurorisë, për veprime të mëtejshme”
