Departamenti Amerikan i Shtetit paralajmëroi sot qytetarët e vet në lidhje me situatat e rrezikshme që duhen shmangur. DASH këshillon qytetarët amerikanë që udhëtojnë apo jetojnë në vendet e tjera të tregojnë kujdes të shtuar. Alarmi vjen pas riaktivizimit të konfliktit Izrael-Palestinë që kanë tensionuar situatën në të gjithë Lindjen e Mesme, por edhe kanë shkaktuar një valë protestash në disa vende perëndimore. Zakonisht, njoftime të kësaj natyre janë lëshuar për rajone të caktuara, por njoftimi i fundit ka të bëjë me të gjitha vendet e botës.
Për shkak të rritjes së tensioneve në vende të ndryshme anembanë botës, potencialit për sulme terroriste, demonstrata ose veprime të dhunshme kundër qytetarëve dhe interesave të SHBA-së, Departamenti i Shtetit këshillon qytetarët amerikanë jashtë shtetit që të tregojnë kujdes të shtuar.
“Qëndroni vigjilent në vendet e frekuentuara nga turistët. Regjistrohu në Programin e regjistrimit të udhëtarëve inteligjentë (STEP) për të marrë informacione dhe sinjalizime dhe për ta bërë më të lehtë gjetjen tuaj në një rast urgjence jashtë shtetit. Ndiqni Departamentin e Shtetit në Facebook dhe Twitter”, apelon DASH.
