Studentët e mjekësisë kanë protestuar sërish ditën e sotme përpara Ministrisë së Arsimit, për të kundërshtuar vendimin që i detyron të punojnë për 5 vite në vendin tonë, pas diplomimit.
Ata janë mbledhur para Ministrisë së Arsimit dhe kanë vijuar protestën e tyre duke hedhur letra higjienike drejt godinës, si edhe duke shfaqur posterat me parrulla që kundërshtojnë ligjin.
Më pas, disa prej studentëve kanë vënë prangat në duar dhe brohorasin: “Duart e prangosura nuk shërojnë”, duke përcjellë mesazhin se nuk mund të mjekojnë, pasi po detyrohen të qëndrojnë në Shqipëri.
Studentët kanë vijuar në javën e tretë të bojkotit, teksa këmbëngulin që ligji për nënshkrimin e kontratës që i detyron ata të qëndrojnë deri në 5 vite në Shqipëri, ose të paguajnë 250 mijë lekë viti, të anulohet. Në rast se nuk ka një përgjigje nga Ministria e Arsimit, studentët paralajmërojnë se nuk do të tërhiqen, pasi kanë mbështetjen e prindërve të tyre.
