Policia e Tiranës ka shpallur në kërkim një tjetër autor për ngjarjes e regjistruar më 12 tetor ku u tentua të digjej lokali “Urgjenca Club”, pranë stadiumit “Selman Stërmasi”, në pronësi të Xhino Gjinit dhe Renato Begajt.
Blutë e kryeqytetit bëjnë me dije se kanë shpallurt në kërkim shtetasin Erald Pazurkiewicz, 41 vjeç, banues në Tiranë, i cili dyshohet se bashkë me Klizjan Bajramin, kanë hedhur benzinë në tarracën e lokalit “Urgjenca Club” dhe i kanë vënë flakën, ku për pasojë u dogjën panelet diellore dhe disa pajisje të tjera, por u shmang shkrumbimi i plotë i tij.
Klizjan Bajramin dhe Erald Pazurkiewicz dyshohet se janë paguar nga Redi Balla për të djegur “Urgjenca Club”, si hakmarrje ndaj pronarit me të cilin kishte konflikte.
Policia më herët ka arrestuar Klizjan Bajramin, ndërsa Redi Balla është shpallur në kërkim dhe Policia njofton se po punojnë për kapjen e tij dhe të 41-vjeçarit Erald Pazurkiewicz që u shpall në kërkim sot.
Kujtojmë se pas arrestimit, Bajrami u rrëfeu hetuesve se Redi Balla i kishte dhënë shumën e 20 mijë lekëve për të “kryer punë” me lokalin.
Njoftimi:
Tiranë/Veprime të thelluara hetimore, në kuadër të operacionit policor të koduar “Fire”, për zbardhjen e plotë të rrethanave të djegies së qëllimshme të një lokali.
Si rezultat i veprimeve hetimore, identifikohet dhe shpallet në kërkim një 41-vjeçar, i dyshuar si bashkëpunëtor në këtë ngjarje.
Specialistët për Hetimin e Krimeve të Komisariatit të Policisë Nr. 2, në vijim të veprimeve hetimore të kryera në kuadër të operacionit policor të koduar “Fire”, për zbardhjen dhe dokumentimin e plotë të djegies së qëllimshme të një lokali në rrugën “Gjin Bue Shpata”, ngjarje e ndodhur më datë 12.10.2023, kanë identifikuar dhe shpallur në kërkim shtetasin E. P., 41 vjeç, banues në Tiranë.
Nga veprimet e thelluara hetimore ka rezultuar se shtetasi E. P., në bashkëpunim me shtetasin K. B. (i arrestuar), kanë hedhur lëndë djegëse në tarracën e lokalit, kundrejt një pagese të kryer nga shtetasi R. B. (i shpallur në kërkim).
Vijon puna për kapjen e shtetasve E. P. dhe R. B.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme.
