Kanceri i gjirit zë pjesën dërmuese sa i takon problematikave onkologjike tek vajzat dhe gratë. Prej disa vitesh trendi i rasteve të reja është i pandryshueshëm, por fatalitetet kanë ardhur në rënie të vazhdueshme.
“Është parë që kemi një numër po aty ku kemi 5 vite që rrotullohemi. Është një numër nga 710-720 raste të reja me kancer dhe në 2022 kemi 710 raste, pra për 5 vjet nuk është se kemi shtim të këtyre rasteve. Vdekje nga kjo patologji për vitin 2022 kanë qenë 192 ndërsa për 2021 kanë qenë 225,” – u shpreh onkologu Helidon Nina.
Prej disa vitesh, gratë janë ndërgjegjësuar sa i takon problematikave të gjirit, dhe kjo duket tek koha që paraqiten tek mjeku.
“Ka nga të dyja kategoritë, por nëse më parë rastet e vonuara predominonin tashmë kemi rastet fillestare të kësaj patologjie. Kjo është një patologji që sa më herët paraqitesh mundësit janë gjithmonë e më të mëdha për t’u trajtuar,” – u shpreh mjeku.
Mjekët rekomandojnë kontrollet periodike me anë të mamografisë, për çdo grua mbi të 50-tat pasi është parë që kanceri i gjirit është më i përhapur pas kësaj grupmoshe.
Veç ndërgjesësimit për ta kapur në kohë sëmundjen, vitet e fundit, sistemi shëndetësor ka bërë hapa para dhe në trajtimin e saj, duke ju dhënë mundësi jete qindra grave çdo vit.
