Presidentja e Komisionit Evropian, Ursula von der Leyen u shpreh ketë të hënë nga Tirana ku u mbajt samiti i Ballkanit Perëndimor, se nuk ka një datë për integrimin e Shqipërisë në Bashkimin Europian.
Në përgjigje të interesit të gazetarëve në konferencën që përmbylli samitin, Ursula von der Leyen theksoi se praktika e Bashkimit Europian është që integrimi realizohet në bazë të meritës.
“…është një proces me meritë dhe është më përfituese për vendet gjithashtu, sepse janë përpjekjet dhe sukseset e tyre që i çojnë përpara dhe gjithashtu për t’i shtyrë për të marrë hapat e nevojshme. Është e bazuar në meritë. Nëse merrni përsipër reformën, do merrni financime dhe fonde. Është një proces tepër i saktësuar dhe kjo është metodologjia që kemi pranuar”, tha ajo.
Në të njëjtën linjë qëndroi dhe kancelari gjerman Olaf Scholz. “Duhet të bëhet sa më shpejt e mundur, por vendet duhet të punojnë shumë që ta arrijnë”, u shpreh ai.
Më herët gjatë samitit, Presidenti i Këshillit Europian, Charles Michel shprehu besimin se “duhet të jemi gati në të dyja anët deri në 2030 për t’u zgjeruar”.
Sulmi në Kosovë
Sulmi ndaj policisë në veri të Kosovës ishte një tjetër çështje e prekur në konferencën përmbyllëse të samitit.
Von der Leyen theksoi se BE ka kërkuar një hetim të hollësishëm lidhur me atë që ndodhi në 24 shtator, ndërsa shtoi se pas rezultatit të këtyre hetimeve do dalë me një vendim për Serbinë.
Të njëjtën gjë shprehu edhe kancelari gjerman teksa shtoi se sulmi ndaj forcave të policisë së Kosovës është diçka që BE dhe Gjermania nuk e pranojnë.
“E dënojmë sulmin ndaj policisë në veri të Kosovës. Kjo është diçka që ne nuk do ta pranojmë në asnjë mënyrë. Gjermania është shumë e qartë në lidhje me këtë qëndrim. Por duhet të ketë një hetim të plotë që duhet të bëhet nga autoritete e Kosovës dhe është e rëndësishme që autoritete serbe të bashkëpunojnë në këtë drejtim. E kuptojmë shumë mirë situatën në Ballkanin Perëndimor dhe e dimë shumë mirë që do të ruhet duke parë drejt së ardhmes dhe jo së kaluarës. Duhet të zgjidhen të gjitha problemet para se të jemi pjesë e BE-së. S’mund të integroheni në BE duke marrë me vete problemet që keni këtu. Vlerësojmë reformat që janë marrë dhe aspekte të tjera, por kjo është përgjigja ime në lidhje me situatën në Kosovë me Serbinë”, tha Scholz.
