Deputetja e së PD-së, Albana Vokshi e quajti diktatorial dhe anti-kushtetues ligjin e qeverisë që detyron studentët e mjekësisë të mos largohen nga vendi pas studimeve, duke u mbajtur diplomat. Vokshi argumetoi se pse nisma e mazhorancës është joligjore dhe denoncoi sesi u frynë kosot e studimeve në relacionin e qeverisë. Ligjëvënësja demokrate paralajmëroi ankim në Gjykatën Kushtetuese për ligjin që po kundërshtohet masivisht dhe nga studentë të mjekeësisë.
Këta të fundit, kanë bojkotuar mësimin dhe kanë zhvilluar protesta që prej nisjes së vitit të ri akademik. Ata paralajmëjonë se këto aksione do të vijojnë nëse qeveria nuk pezullon ligjin.
Qeveria nga ana tjetër ka argumentuar se ligji erdhi si nevojë për të frenuar emigrimin e bluzave të bardha, megjithatë, përveç studentëve, nisma është kritikuar edhe nga ekspertë të fushës.
Fryrja e tarfiës së studimit
Në një deklaratë nga selia blu, Albana Vokshi tha se “në muajin korrik, në mënyrë dinake, fshehurazi, në shkelje të procedurave, rregullores se kuvendit, pa studime e analiza, me mashtrime Rama – Nikolla – Kushi – Manastirlliu, sollën në parlament një projektligj antikushtetues, që tentonte të mbante peng diplomat e e studentëve të mjekësisë për 5 vjet.”
“Duke luajtur gjoja kartën e patriotizmit, Edi Rama ngriti fabulën që Mjekësia është një profesion ndryshe nga të tjerët, pasi shtetit i kushtin shumë formimi i mjekëve të rinj, për të mbrojtur jetën dhe shëndetin e qytetarëve të vet. Si e bëri këtë, duke përdorur Universitetin e mjekësisë për kosto shumë herë më të larta, se ato realet, duke u munduar që siç bën gjithnjë të vinte studentët përballë qytetarëve. Një ligj antikushtetues, diskriminues, jo efektiv, i padrejtë u miratua më nxitim, në mes të natës, duke refuzuar të dëgjonin zërin e studentëve. Një ligj, me anë të të cilit Edi Rama synon të mbulojë dështimin e premtimit të bujshëm të shëndetësisë falas, dështimin e politikave në shëndetësi, dështimin e koncesioneve që kanë shkatërruar çdo shtyllë të shëndetësisë. Një ligj që dëmton universitetin publik e që orienton studentët drejt privatit”, tha Vokshi.
Ajo silli në kujtesë se në vitin 2019, Universiteti i Mjekësisë e ka përllogaritur koston e studimit në programin e Mjekësisë së përgjithshme me vlerën 236.468 lekë/vit.
Kjo vlerë, sqaroi, është dërguar me shkresë zyrtare nga Universiteti i Mjekësisë si përgjigje ndaj Qëndresës Qytetare (shkresa numër protokolli 2206/1, datë 17.07.2023), pra katër ditë përpara miratimit të ligjit famëkeq që merr peng diplomat e studentëve të Mjekësisë.
Ndërkohë, shtoi, në relacionin e përgatitur në Parlamentin e Shqipërisë citohet se “Sipas informacionit të përcjellë nga Universiteti i Mjekësisë, Tiranë, kostoja e studimit për programin e integruar të studimit në “Mjekësi e Përgjithshme” është 678.994 lekë/vit”.
“Si në diktaturë”
Mazhoranca socialiste në mënyrë të qëllimshme, theksoi, e ka trefishuar koston e studimit për të arritur, duke mashtruar, qëllimet e saj, dhe miratuar një ligj diktatorial.
“Në vendimet e datave 6 dhe 9 tetor 2023, të Senatit dhe Bordit Administrativ të Unuversitetit të Mjekësisë, kostoja e miratuar është 248.975 lekë/vit. Siç duket qartë, shuma e re e pas katër viteve është e përafërt; me një ndryshim prej vetëm 12 mijë lekësh. Edhe pse Ministrja e Shëndetësisë ka ushtruar presion për rritjen e kostove, Bordi ka refuzuar. Është alarmante dhe e patolerueshme që deputetët e mazhorancës me urdhër të Ramës, në një lëvizje jo etike dhe joligjore, të ndërhyjnë marrin vendime për miratimin e ligjeve me mashtrime, pa analiza e kosto reale, por vetëm me urdhër të Edi Ramës, duke tentuar të caktojnë edhe vendin e punës së studentëve të mjekësisë duke ju mbajtur peng diplomat 5 vjet“, tha Vokshi.
Deputetja u shpreh se kjo bëhej vetëm në kohët kur Parlamenti i Shqipërisë quhej Kuvendi Popullor, dhe ishte nën urdhrat e Enver Hoxhës.
“Ligji i paligjshëm”
Ajo argumetoi se pse zbatimi i ligji është i pavlefshëm.
“Për dijeni të publikut, neni 4 i ligjit të miratuar nga deputetët e Edi Ramës, parashikon se studentët e vitit të parë duhet të nënshkruajnë kontratën përpara datës së testimit të informatizuar në QSHA, pra që në gusht. Faktikisht, ata ende nuk e kanë marrë kontratën, duke qenë se vlera është miratuar vetëm në tetor 2023. Vendimi Nr. 527, dt 7.9.2023 në pikën 6 përcakton që kosto duhej përllogaritur para fillimit të vitit akademik. Kjo e bën të pavlefshëm zbatimin e ligjit për të gjithë studentët aktualë të programit Mjekësi e Përgjithshme, që nga viti i parë e deri në vitin e fundit. Praktikisht ligji ka rënë!! Ka rënë sepse një masë shtrënguese si kjo nuk e zgjidh problemin. Ky ligj cenon të drejtën e lëvizjes së lirë të drejtën për arsimim Qeveria dhe grupi i saj parlamentar janë në paligjshmëri totale, janë në gjueti shtrigash kundër mjekëve të ardhshëm të vendit, janë në ngjashmëri me etërit e tyre të Partisë së Punës”, tha Vokshi.
“Rektori kundër studentëve”
Ajo tha se rektori i mjekësisë në vend që të mbronte interesat e stundetëve ka bashkëpunuar me qeverinëkundër interesit të tyre.
“Qeveria ka gjetur një aleat, fatkeqësisht, edhe te ai që duhej të ishte mbrojtësi i studentëve, rektori i Universitetit të Mjekësisë, sepse qeveria i siguron mbrojtjen për të cilën ai ka nevojë. Sa për kujtesë: Rektori i Universitetit të Mjekësisë është aktualisht nën hetim nga SPAK për koncesionin e Sterizilimit dhe ndaj tij ka masë detyrimi paraqitje nga SPAK. Në vend që të pezullohej nga detyra deri në fund të hetimeve dhe provimit ose rënies së akuzës së rëndë, ai ka bashkëpunuar me qeverinë kundër studentëve”, deklaroi.
Efektet negative
Vokshi u shpreh më tej se miratimi i ligjit, ka prodhuar menjëherë efektet e saj negative.
“Kërkesa për degën e Mjekësisë u ul me mbi 40%, rrjedhimisht me shumë gjasa duke ulur edhe cilësinë. Qeveria ka mundësuar kështu që kërkesat për degën e Mjekësisë në Universitetin publik të shmangen drejt privatit apo të shkojnë në universitetet jashtë duke minuar kështu sektorin publik“, deklaroi.
Ankim në Kushtetuese
Në fund të deklaratës, paralajmëroi ankim të ligjit në Gjykatën Kushtetuese.
“Partia Demokratike është dhe do të jetë në krah të studentëve dhe kërkesave të tyre të drejta dhe kushtetuese. Menjëherë do të kërkojmë dëgjesë në Komisionet parlamentare me ministren e arsimit dhe shëndetësisë. PD do ta ankimojë ligjin në Gjykatën Kushtetuese”, e mbylli reagimin Vokshi.
