Një ngjarje e rëndë është regjistruar mesditën e kësaj të enjteje në Theth, ku ka ndërruar jetë një turiste 31-vjeçare gjermane.
Raportohet se teksa ka qenë duke eksploruar malet e Thethit me një grup turistësh të tjerë, ajo ka rënë në greminë, ku fatkeqësisht ka humbur jetën.
Njoftimi:
Mesditën e sotme, salla operative e Komisariatit të Policisë Shkodër ka marrë njoftim nëpërmjet një telefonate se shtetasja gjermane R. P., 31 vjeçe, duke u ngjitur në mal, bashkë me një shtetas tjetër gjerman, në vendin e quajtur “Shpella e Harapit”, Shalë, Shkodër, kishte rrëshkitur dhe kishte rënë në greminë.
Si pasojë e dëmtimeve, kjo shtetase ka humbur jetën.
Shërbimet e Policisë janë nisur në vendin e ngjarjes, bashkë me shërbime të specializuara, për të nxjerrë trupin e pajetë të kësaj shtetaseje, nga terreni i vështirë malor ku ka rënë.
Grupi hetimor vijon punën për sqarimin e rrethanave të kësaj ngjarjeje.
