Policia e Shtetit, me urdhër të SPAK, është duke zhvilluar një mega-operacion në disa qytete si në Tiranë, Krujë, Durrës, Vlorë dhe Kurbin.
Burime bëjnë me dije se uniformat blu kanë rrethuar banesën dhe lokalin e Gëzim Çelës në zonën e Fushë-Kuqes. Po të njëjta burime bëjnë me dije se SPAK ka lëshuar disa urdhër-arreste, ku mes tyre ka edhe për efektivë policie.
Mes të prangosurve mësohet se është edhe ish-shefi i komisariatit të Kurbinit, Dritan Meta.
Urdhër-arrestet vijnë në kuadër të operacionit policor të koduar “Flakë Deti” të ekzekutuar në muajin dhe sipas hetimeve, dyshohet se u trafikuan mbi 1 ton kanabis që do të shkëmbeheshin me kokainë në det në velierën që u fundos.
Në atë aksion u godit një tentativë e trafikimit të drogës me varkë velierë nga lugina e Patokut në drejtim të Italisë. Në atë aksion Policia arrestoi kushëririn e Gëzim Çelës, Nerim Çela, si dhe ish-punonjësin e Policisë së Shtetit Arlind Ismailukaj, Armando Mema, Besnik Brokeri nga Vlora dhe dy korrierët me shtetësi ukrainase Kyrylo Ponomarenko dhe Kostiantyn Biellon.
Kush është Gëzim Çela?
Gëzim Çela njihet ndryshe me nofkën “Baroni i drogës”, teksa prej vitit 2015 ai është shpallur në kërkim ndërkombëtar pas një vendimi të dhënë nga Gjykata e Krimeve të Rënda.
Gjatë hetimit të asaj periudhe, Çelën shfaqet si organizator dhe financues i një grupi kriminal, që kryente trafikun e heroinës dhe hashashit në Kosovë, Greqi dhe në Itali.
Çela, rezulton i dënuar me 20 vite burgim nga Gjykata e Krimeve të Rënda, por që nga viti 2015, policia nuk ka mundur ta lokalizojë dhe arrestojë, megjithëse ka pasur mjaft informacione se ai qëndron i lirë në zonën e lagunës së Patokut.
Çela ka vijuar aktivitetin e tij i pashqetësuar. Ndërsa grupi ku ai është dënuar për herë të parë, përbëhej nga Valentina Tufina e njohur si “Tezja e Kokainës”, Fran Mërdhoci, Alfred Mikeli, Arif Çela, Viktor Lekgega, Reald Hysolli etj.
