Tre persona janë arrestuar dhe një është shpallur në kërkim në kuadër të operacionit antidrogë “Porosia”, që çoi në sekuestrimin e rreth 22 kg kanabis, 2 armë gjahu dhe municion luftarak.
Në pranga u vunë Sokol Meçaj, 59 vjeç, Yzeir Brakaj, 47 vjeç dhe Fation Bashaj, 35 vjeç, të tre banues në Fier, për veprën penale “Prodhimi dhe shitja e narkotikëve”.
U shpall në kërkim Nertil Memini, 33 vjeç, banues në fshatin Panaja, Vlorë, për veprat penale “Prodhimi dhe shitja e narkotikëve” , “Mbajtja pa leje dhe prodhimi i armëve, armëve shpërthyese dhe municionit” dhe “Prodhimi dhe mbajtja pa leje e armëve të gjuetisë dhe sportive”.
Gjatë operacionit janë sekuestruar rreth 22 kg lëndë e dyshuar narkotike kanabis, 2 armë gjahu dhe municion luftarak, të cilat u gjetën gjatë kontrollit në banesën e shtetasit të shpallur në kërkim.
Operacioni është kryer me metoda proaktivive nga policia e Elbasanit, në bashkëpunim me atë të Vlorës e Fierit, nën drejtimin e Prokurorisë Elbasan. Sipas një njoftimi nga policia, dyshohet se aktiviteti i personave të shpërmendur shtrihej në disa qarqe të vendit, ndërsa hetimet vijojnë.
