Policia e Sarandës ka arrestuar një 56-vjeçar i cili shiste ushqime dhe produkte të skaduara në një dyqan pranë shkollës në Konispol. Në pranga është vënë shtetasi Neim Arapi, me detyrë përgjegjës i Policisë Bashkiake Konispol.
“Gjatë kontrolleve, në një subjekt tregtar që ushtronte aktivitetin brenda perimetrit të sigurisë së një shkolle të mesme, në Konispol, punonjësit e Policisë kanë konstatuar se pronari i këtij subjekti shiste mallra të kontrabanduara, një pjesë e madhe e të cilave përbënin rrezik për shëndetin e nxënësve dhe të qytetarëve të tjerë, sepse iu kishte kaluar afati i konsumimit.” – thuhet në njoftimin e policisë.
Po ashtu, autoritetet bëjnë me dije se nga verifikimet ka rezultuar se ky shtetas duke përdorur detyrën, ka ndikuar për të shmangur kontrollet në subjektin ku shiteshin produkte pa faturë. Në cilësinë e provës materiale janë sekuestruar produkte të ndryshme ushqimore të kontrabanduara dhe të skaduara.
Materialet procedurale i kaluan Prokurorisë së Sarandës për veprime të mëtejshme.
