Nga Boldnews.al
Drejtuesi i Prokurorisë së Posaçme, Altin Dumani, në një takim informal me median në mesin e kësaj jave, premtoi “zhvillime surprizuese” që lidhen me hetimet për ish-zv.kryeministrin, Arben Ahmetaj.
Ish-numri dy i qeverisë së Edi Ramës gjatë gjysmës së mandatit të tretë të Edi Ramës aktualisht është në kërkim ndërkombëtar, i dyshuar nga SPAK-u për korrupsion, pastrim parash dhe fshehje të pasurisë, si pjesë e dosjes së “Inceneratorëve”.
Dumani nuk pranoi të jepte detaje mbi “zhvillimet surprizuese” të pritshme dhe as se për cilën dosjen hetimore bëhet fjalë.
Në materialin e dorëzuar pranë Parlamentit, në verën e këtij viti, ku kërkohej autorizimi për arrestimin e deputetit Ahmetaj, Prokuroria e Posaçme duket se kishte kryer një hetim të plotë e të gjithëanshëm mbi pasurinë dhe rolin e tij në procedurat koncesionare të inceneratorëve Elbasan, Fier dhe Tiranë, përgjatë kohës që ka mbajtur funksionet e Ministrit të Ekonomisë dhe më tej atë të Financave.
Ndaj, ajo që parapriu shefi i Prokurorisë së Posaçme duket se ka lidhje me një tjetër hetim penal që po zhvillohet ndaj tij.
“Boldnews.al” ka raportuar më herët se emri i Arben Ahmetajt është pjesë e një dosje tjetër hetimoreje, që lidhet me procedurat e privatizimit të aksioneve të ish-kompanisë publike, “Buka sha”.
Të dhënat e siguruara nga redaksia më herët tregonin se dosja “Buka” është në një fazë të avancuar hetimore. Madje, prokurorët kanë sekuestruar edhe telefona të disa zyrtarëve e ish-zyrtarëve në Ministrinë e Ekonomisë dhe të Financave, si edhe personave të tjerë, përfshirë atë të biznesmenit Lirim Fezollari.
Ky i fundit përfitoi aksionet e “Buka” sha, bazuar në një procedurë ankandi të zhvilluar nga Arben Ahmetaj në vitin 2015 dhe që u konstatua e paligjshme nga gjykata.
Pak muaj më parë, SPAK-u deklaroi në mënyrë konfidenciale për “Boldnews.al” se kishte dërguar letër-porosi në disa shtete europiane, nën dyshimet se mund të zbulonte udhëtime të përbashkëta të Arben Ahmetajt dhe biznesmenit Lirim Fezollari.
Është e paqartë se çfarë mund të pritet apo mund të ketë ardhur në zbatim të atyre letër-porosive. Por, përderisa kreu i SPAK-ut, Dumani, u shpreh për “zhvillime surprizuese”, atëherë ndoshta bindja e tij mund të lidhet pikërisht me përgjigjet që kanë marrë nga autoritetet e huaja për kërkesat e tyre.
Ankandi problematik i “Buka”
“Boldnews.al” ka raportuar më parë për dosjen “Buka”, në të cilën duket se janë të përfshirë disa zyrtarë të lartë të shtetit shqiptar.
Në fillim Arben Ahmetaj, më tej Shkëlqim Cani dhe në fund Erion Veliaj, kanë ndërmarrë një seri aktesh, në kundërshtim me vendimet e gjykatave, madje edhe asaj Kushtetuese, për t’i dhënë biznesmenit Lirim Fezollari prona publike, të cilat u ishin njohur pronarëve.
Dhe më tej, këto prona u shndërruan në asete tejet fitimprurëse për biznesmenin, duke shënuar një skandal shumë të rëndë financiar dhe ligjor, ku e shohin veten të përfshirë më së paku tre bashkëpunëtorë të ngushtë të kryeministrit Edi Rama.
Rasti doli në sipërfaqe disa muaj më parë, kur Struktura e Posaçme Anti-Korrupsion (SPAK), thirri si “person që ka dijeni” Shkëlqim Canin, ish-ministrin e Financave në mandatin e parë qeverisës së Edi Ramës.
Cani u paraqit para prokurorëve, pas kallëzimit të përfaqësuesve të një familjeje të vjetër tiranase, të cilat panë me sytë e tyre se si prona e trashëguar po u tjetërsohej në favor të Lirim Fezollarit dhe askush nga qeveritarët nuk pranoi t’i dëgjonte.
“Boldnews.al” ka siguruar detaje mbi këtë çështje, të cilat gjenden në vendimet e formës së prerë të gjyqësorit shqiptar.
Historia e skandalit qeveritar
Në Korrik të vitit 1995, një vendim i Komisioni i Kthimit dhe Kompensimit të Pronave (KPPP), i saktësuar nga një vendim gjyqësor i asaj kohe, i ka njohur një familjeje të vjetër tiranase pronësinë në një sipërfaqe 8980 m2 në zonën e “5 Majit”, nga e cila 4890 m2 ishte ndërtesë e fabrikës shtetërore të Bukës.
Dy muaj më pas, në Tetor 1995, është regjistruar shoqëria tregtare anonime “Buka” sha, në pronësi absolute të shtetit shqiptar, nëpërmjet Ministrisë së Financave. Pjesë e aseteve të kësaj shoqërie ishte edhe trualli, i cili i ishte njohur familjes tiranase.
Në vitin 1996, Ministria e Financave vendosi shitjen e 49 përqind të aksioneve të saj, duke vijuar të ruajë kontrollin mbi shoqërinë “Buka” sha.
Në vitin 2000, Ministria e Financave ka llogaritur kuotat që i takojnë ish-pronarëve në shoqërinë “Buka” sha. Për ish-pronarët e truallit të kësaj shoqërie është akorduar vlera prej 8.8 milionë lekë të reja, që i korrespondon një pakete prej 3.1 përqind të aksioneve.
Në vitin 2004, Ministria e Ekonomisë vendos të shesë aksionet e saj në shoqërinë “Buka” sha, në shifrën 47.65 përqind.
Trashëgimtarët e truallit kanë kundërshtuar në rrugë gjyqësore, si vlerën e kuotave që u është përcaktuar nga Ministria e Ekonomisë, po ashtu edhe procedurën e ankandit, derisa të sqarohet përfundimisht sasia e aksioneve në “Buka” sha.
Ndër të tjera, vendimi i Ministrisë së Ekonomisë për numër minimal kuotash, u hiqte të drejtën atyre jo vetëm të një vlerësimi të drejtë, por edhe të përfshirjen në ankand me të drejtën e parablerjes së aksioneve qeveritare.
Kërkesa e tyre pranohet nga Gjykata e Apelit në vitin 2006 dhe Ministria e Ekonomisë detyrohet nga gjykata që të anulojë ankandin, si edhe të vlerërojë trashëgimtarët e pronarit me vlerën e tregut.
Ministria e Ekonomisë anuloi procedurën e ankandit, por për vite me radhë nuk zbatoi pjesën e vendimit për ri-llogaritjen e aksioneve të trashëgimtarëve dhe vlerësimin e tyre.
Në vitin 2014, Ministri i Ekonomisë së kohës, Arben Ahmetaj, shpall sërish ankandin për shitjen e 47.6 përqind të aksioneve shtetërore në “Buka” sha.
Këtu është momenti kur shfaqet biznesmeni Lirim Fezollari. Në shtator 2014, ai fillimisht kishte blerë 15 përqind të aksioneve. Brenda tre muajve, deri në nëntor 2014, Fezollari arrin të blejë 40 përqind të aksioneve nga moria e ortakëve në minorancë (kryesisht ish-punonjës të “Buka” sha).
Pra, në momentin e shpalljes së ankandit, Lirim Fezollari rezultonte efektivisht aksioneri i dytë më i madh i “Buka” sha, pas Ministrisë së Ekonomisë.
Por, kjo situatë e aksionerëve nuk kishte reflektuar vendimin e Gjykatës së Apelit të vitit 2006, e cila kërkonte ri-vlerësimin e kuotave në shoqëri të trashëgimtarëve të truallit, ku gjendeshin godinat e “Buka” sha.
Ankandi i paligjshëm
Në Shtator 2014, Ahmetaj shpall procedurat e ankandit për shitjen e aksioneve të qeverisë në “Buka” sha., ndërkohë që nuk ishte zbatuar ende vendimi i formës së prerë, të marrë nga i Gjykata e Apelit në vitin 2006, për ri-llogaritjen e kuotave të ish-pronarëve në “Buka” sha.
Në Qershor të vitit 2015, Komisioni i Ankandit, i ngritur pranë Ministrisë së Financave, e cila në atë kohë drejtohej nga Shkëlqim Cani, nënshkruar një marrëveshje paraprake me biznesmenin Lirim Fezollari, ku përcaktohen modalitetet e procedurës.
Pra, duket qartë që në ankand nuk janë thirrur trashëgimtarët e ish-pronarit të truallit.
Në Gusht 2015, Ministria e Financave shpall biznesmenin Fezollari fitues të ankandit për blerjen e aksioneve (rrjedhimisht edhe aseteve) të shoqërisë anonime “Buka” sha.
Ndërkohë që zhvilloheshin këto procedura, trashëgimtarët e ish-pronarit i drejtohen sërish gjykatës, ku kërkohej anulimi i ankandit të shpallur rishtazi, si edhe rivlerësimin e pronës me çmimet e përcaktuara, sipas një vendimi të Gjykatës Kushtetuese të vitit 2001 dhe akteve pasuese të tij.
Ministria e Financave u tregua e paduruar për të mbyllur ankandin, ndërkohë që institucioni ishte i paditur në gjykatë dhe procesi gjyqësor ishte në vijim.
Në tetor 2015, vetëm dy muaj pas shpalljes së rezultateve të ankandit, Gjykata Administrative e Shkallës së Parë u jep të drejtë ish-pronarëve, duke vendosur gjithashtu anulimin e pasojave të procedurës.
Çështja shkon në Apel, me ankimues Ministrinë e Ekonomisë, si institucioni që kishte urdhëruar zhvillimin e ankandit.
Ndërkohë që çështja priste vendimin në Apel, rezulton se biznesmeni Lirim Fezollari, si aksioneri maxhoritar i “Buka” sha, shet asetet e shoqërisë, konkretisht trojet e saj, tek kompania “Tobbaco Holding”, e cila ishte gjithashtu në pronësi të saj.
Në nëntor të vitit 2017, Gjykata Administrative e Apelit u jep përfundimisht të drejtë ish-pronarëve, si për anulimin e ankandit, ashtu edhe për rivlerësimin e kuotave në shoqërinë “Buka” sha.
Por, tashmë, një pjesë e aseteve të saj, kryesisht në zonën “5 Maji” dhe tek “Pallati me Shigjeta”, Lirim Fezollari ia kishte shitur Lirim Fezollarit (shoqërisë “Tobbaco Holding”).
Në këto prona, biznesmeni Fezollari ka marrë leje nga kryetari i Bashkisë së Tiranës, Erion Veliaj, për të ndërtuar një qendër tregtare (në zonën e “5 Majit”), si edhe ka ndërtuar një kompleks lojërash (tek “Pallati me Shigjeta”).
