Në ditën e pestë të betejës me flakët në masivin pyjor të Pishporors situata sa vjen e përkeqësohet. Era e fortë ka aktivizuar të gjitha vatrat e zjarrit, ndërkohë që forcat e armatosura janë tërhequr në pamundësi operimi.
Në terren për të monitoruar situatën ka zbritur dhe kreu i emergjencave civile, Haki Çako i cili tha se sot janë duke operuar me mjete të tjera si buldozer, ndërkohë që theksoi se qëllimi është që zjarri të mbahet larg zonave të banuara.
“Është masiv i jashtëzakonshëm i dendur pyjor. Ka disa ditë, me të gjitha strukturat operacionale është operuar dhe vijon të operohet. Zjarret masive në pyje të tilla, kanë vështirësitë e veta. Sa i përket operimit, ne kemi vlerësuar situatën por për shkak të kohës në operim të helikopterit. Ne jemi duke vlerësuar situatën nëse do adresojmë pjesë të tjera për mbështetje. Sot po operojmë me mjete të tjera, buldozier etj. Ajo që është më e rëndësishmja është ta përkufizojmë zjarrin në aspektin e rrëfimit për t’i bërë. Ajo që vlen të theksohet është se pas punës së jashtëzakonshme që kemi bërë kanë mundësuar gjatë mbrëmjes së djeshme që këtë perimetër zjarri ta mbajmë larg zonave të banuara”, tha Çako.
Ndërkohë prefekti i qarkut Fier, Lefter Shehaj tha se është djegur një sipërfaqe prej 500 HA sipërfaqe pyjore me pisha në zonën e mbrojtur, ndërkohë që forcat janë afr5uar pranë zonës së banuar për të vënë nën kontroll arrat e mbjella dhe banesat.
“Zona është e mbrojtur, kjo situatë ka 5 ditë që po e ndjekim. Kemi aktivizuar mjete zjarrfikësve. Zjarri është në kurorë, që na ka vështirësuar shumë punën në terren. Kemi tërhequr edhe efektivë herë pas herë pasi rrezikohej jeta e tyre nga zjarri. Banesat, stanet kanë qenë prioriteti ynë. Kemi ndërhyrë edhe gjatë natës. Aktualisht nuk kemi problematikë. Ne kemi aktivizuar të gjitha kapacitetet tona me zjarrfikëset”, tha prefekti.
