Dean Liço ishte protagonist te fitorja e Skënderbeut ndaj Erzenit.
Mesfushori korçar goditi 3 herë nga pika e bardhë e penalltisë, ku mposhti portierin Hasanbelli në tentativën e parë, por më tej gaboi dy herë brenda pak minutash.
Në një prononcim për “Panorama Sport”, në përfundim të ndeshjes, Liço foli për këtë fitore të rëndësishme, tregon situatën te klubi korçar, si edhe dhe objektivat personale që ai ka në të ardhmen edhe pse aktualisht është një nga lojtarët kryesorë të Ivan Gvozdenoviçit te skuadra bardhekuqe.
Liço, protagonist me golin e shënuar, si ndiheni?
U futëm në fushë për tri pikët dhe ia dolëm. Për mua rëndësi ka që arritëm të fitonim kundër një rivali të fortë si Erzeni, i cili vinte pas triumfit me Tiranën në transfertë.
Shënuat një penallti, ndërkohë gabuat dy herë të tjera, mund të themi se çfarë ndodhi?
Kam siguri te vetja dhe në tentativën e parë nuk i dhashë asnjë shans portierit. Më tej gabova dy herë, fati nuk ishte me mua, por kjo edhe për meritë të portierit Hasanbelli.
Gjashtë ndeshje dhe keni marrë 9 pikë, cili është objektivi i Skënderbeut për këtë sezon?
Objektivi ynë është ndeshja e radhës. Do të mundohemi t’i marrim sfidat një e nga një dhe më pas do të vendosim. Kemi një skuadër cilësore që mund të surprizojë këdo. Fakti që kemi nëntë pike deri tani nuk është rastësi.
Jeni produkt i futbollit të huaj, pasi keni luajtur me të rinjtë e Leganesit dhe Sportingut, a e shikoni këtë sezon trampolinë për të ardhmen?
Ajo që duhet të theksoj është fakti që gëzoj një formë të shkëlqyer sportive. Padiskutim që objektivi im është futbolli elitar në një kampionat më të fortë të Europës. Megjithatë, më duhet të ndihmoj fillimisht Skënderbeun, e më pas do të shikoj edhe ofertat që do të kem.
