Burime për mediat bëjnë me dije se Policia ka arrestuar pak ditë më parë, 39-vjeçarin Artan (Marius) Tafani, i cili akuzohet si aurtor i grabitjes me armë të një pike të këmbimit valutor në zonën e Astrit në Tiranë, më 24 Qershor të këtij viti.
Mësohet se ai është mbajtur nën vëzhgim dhe është kapur në Lushnjë. Kapja e tij është mbajtur sekret për shkak të hetimeve dhe rrëfimeve që po bënte për ngjarjet kriminale, pasi ai është kthyer në një të penduar të drejtësisë.
Nga rrëfimi i Tafanit, i cili është kthyer në bashkëpunëtor të drejtësisë, burime bëjnë me dije se janë zbardhur 6 vrasje, 2 në Greqi, në Tiranë, Elbasan dhe Berat, si dhe janë firmosur 15 urdhër-arreste. Burime bëjnë me dije se po zhvillohet një mega-operacion në disa qytete që prej mesditës së sotme.
39-vjeçari ka pranuar të rrëfejë gjithçka duke nxjerrë zbuluar një grup vrasësish me pagesë, të përfshirë në disa ngjarje kriminale. Dyshohet se bëhet fjalë për një grup vrasësish me pagesë të udhëhequr nga Laert Haxhiu, i shumëkërkuari i drejtësisë i arrestuar në Greqi, por që është refuzuar ekstradimi i tij.
Mësohet se urdhër arrestet janë lëshuar nga Prokuroria e Elbasanit, ndërsa më pas dosja do i kalojë SPAK-ut për procedura të tjera hetimore.
Artan (Marius) Tafanit i është komunikuar këtë të mërkurë masë në Tiranë dhe në vijim pritet t’i komunikohen brenda vendit edhe 2 masa të tjera.
Më 24 Qershor të këtij viti Artan (Marius) Tafani, nën kërcënimin e armës grabiti rreth 30 mijë euro dhe e gjithë skena u filmua nga kamerat e sigurisë.
Si ndodhi grabitja?
Grabitësi ishte i veshur me të zeza, me fytyrën e mbuluar me maskë anti-covid dhe me syze të errëta, u fut në ambientet e brendshme të pikës së këmbimit valutor. Agresori shihet teksa nxjerr një pistoletë që nuk dihet nëse është armë e vërtetë apo imituese dhe me shpejtësi hynë në pjesën e banakut ku qëndrojnë punonjëset. Nën kërcënimin e armës kërkon paratë dhe në një moment godet me grusht në shpinë njërën prej punonjëseve.
E gjendur nën kërcënimin e armës, ajo i tregon grabitësit sirtarët ku mbahen paratë. Autori me shpejtësi nis marrjen e kartmonmedhave të cilat i fut në pjesën e brendshme të bluzës teksa kontrollon ngado me armën në dorë. Gjatë kohës që grabitësi merr topat me para, në derën e parë të pikës së këmbimit valutor shfaqet një grua, së cilës, sipas pamjeve të kamerës, njëra prej punonjësve ia bën me shenjë dhe ajo largohet menjëherë. E gjithë skena zgjat rreth 1 minutë e 20 sekonda. Grabitësi u largua qetësisht nga biznesi dhe me një biçikletë humbi gjurmët nëpër rrugica.
