Kryeministri i Kosovës, Albin Kurti ka reaguar pas përfundimit të operacionit të Policisë së Kosovë për bastisjen në fshatin Banjskë të Zveçanit.
Në një postim në rrjetet sociale, Kurti shprehet se serbët në Kosovë nuk kanë nevojë për çlirim nga Republika e Kosovës por nga veglat terroriste të Serbisë. Ai zbulon edhe disa deklarata të presidentit serb në takimin e 2 Majit në Bruksel.
Sipas Kurtit, Vuçiç është i obsesionuar me kryekomandantin e UÇK-së, Adem Jashari dhe sipas tij,dëshironte që më 24 shtator ta shndërronte Manastirin Ortodoks të Banjskës në “Kullë të Jasharajve” për serbët e Kosovës. Kryeministri i Kosovës tregon se Vuçiç ka deklaruar në Bruksel se Milan Radojiçiç do të bëhet Adem Jashari i serbëve.
“Kosova është shtet demokratik dhe vend properëndimor: kush integrohet, jeton më mirë. Serbët në Kosovë nuk kanë nevojë për çlirim nga Republika e Kosovës por nga veglat terroriste të Serbisë.
Vuçiç është i obsesionuar me kryekomandantin e UÇK-së, Adem Jasharin. Ai dëshironte që me 24 shtator ta shndërronte Manastirin Ortodoks të Banjskës në “Kullë të Jasharajve” për serbët e Kosovës! Në takimin e 2 majit në Bruksel na tha që Millan Radojçiq do të bëhet Adem Jashari i serbëve. Por, duke qenë diktator, ai s’e kupton historinë: epopeja dhe çlirimi nuk fabrikohen dhe as s’kopjohen.” shkruan Kurti.
