Milan “hodhi pas krahëve” disfatën në derbi ndaj Interit dhe u rikthye te fitorja në kampionat teksa mposhti minimalisht me rezultatin 1-0, Veronën. Kuqezinjtë iu falën një goli të Rafael Leaos, me portugezin që i dhuroi tre pikë të çmuara skuadrës. Megjithatë, goli nuk mjafton për një legjendë si Arrigo Sacchi i cili shprehet se Leao është një problem për Milanin pasi me individualietin e tij në fushë, nuk i lejon kuqezinjtë të shfaqen si një skuadër që luan në grup.
“Leao shënoi një gol të bukur ndaj Veronës, por Milani është shumë i varur nga portugezi dhe ky është një problem. Me mënyrën si qëndron në fushë, faktin që nuk kthehet për të mbrojtur dhe me mungesën në pjesëmarrje në punën e të gjithë grupit, bën që Milani me Leaon të mos shfaqet si një skuadër në fushë.
Nëse kërkojnë që ekipi të rrisë performancën dhe të aplikojnë një futboll europian, atëherë është thelbësore që të gjithë të jenë funksionalë në projekt dhe të dijnë të sakrifikojnë për skuadrën. Është e dukshme që Milani po kërkon të përmirësohet, por ka ende disa hapa që duhen ndërmarrë. Një humbje si ajo që pësuan në derbi nuk kalon lehtë”, u shpreh Sacchi.
