Partia Socialiste fiton sërish bashkinë e Kukësit në zgjedhjet e 24 Shtatorit, që erdhën pas largimit të Safet Gjicit si kryebashkiak për shkak të videoskandalit seksual. Fitorja këtë herë është më e thellë se ajo e 14 Majit.
Matematika i lejoi socialistëve në KZAZ ku po numërohen votat e fundit të festojnë fitoren pa u mbyllur i gjithë procesi i numërimit.
Sipas të dhënave nga Komisioni Qendror i Zgjedhjeve, 13 025 vota mori kandidati socialist Albert Halilaj, kundrejt 7 431 të rivalit nga koalicioni opozitar “Bashkë Fitojmë” Emri Vata.
Në 14 Maj, Safet Gjici i PS fitoi ndaj rivalit të “Bashkë Fitojmë” Admir Sinamati me 2 031 vota diferencë, që në këto zgjedhje u thellua në 5 594 vota.
Kryebashkiaku i ri Albert Halilaj tha pas konfirmimit të fitores se “do të jem i thjeshtë dhe do u vij në ndihmë të gjithë qytetarëve, lidhur me infrastrukturën, papunësinë, zhvillimin ekonomik, dhe promovimin e turizmit”.
Kryeministri dhe kreu i PS, Edi Rama, i cili përmes një postimi në “FB” më herët gjatë ditës shpalli triumfin e parakohshëm, u shpreh se fitorja e PS “flet qartë për besimin dhe për pritshmërinë e qytetarëve kuksianë ndaj nesh, si edhe për detyrimin tonë të madh ndaj tyre, për të bërë shumë më shumë akoma për Kukësin”.
Drejtuesi politik i PS-së në Kukës Pandeli Majko vlerësoi kandidaturën e socialistëve. “Kjo fitore i dedikohet se pari kandidaturës së mrekullueshme që ky komunitet përzgjodhi, ai është Albert Halilaj. Më pas ka të bëjë me disa gjëra që ky qytet i shpreh pa folur. E ka të veçantë këtë se duhet të jesh i kujdesshëm se duket sikur të përkrah, por mund të ndodhë e kundërta. Kukësi na ka futur në një borxh shumë të thellë”, tha Majko në një prononcim për gazetarët.
Nga ana e përfaqësuesve të opozitës nuk ka ende një reagim.
Kuksianët votuan të dielën për të zgjedhur kreun e ri të bashkisë. Në krahasim me 14 Majin kur u mbajtën zgjedhjet vendore, pjesëmarrja dje ishte më e ulët. Sipas të dhënave paraprake, kutive të votimit i janë drejtuar rreth 3 mijë votues më pak.
Procesi i votimit ishte përgjithësisht i qetë. Përfaqësues të koalicionit opozitar ‘Bashkë Fitojmë’ denoncuan gjatë paradites së të dielës prezencën në disa qendra të votimit të përfaqësuesve të PS që sipas tyre, mbanin shënim zgjedhësit që shkonin për të votuar.
Zgjedhjet në Bashkinë e Kukësit vijnë si pasojë e largimit të Safet Gjicit nga posti i kryebashkiakut, pas publikimit të video-skandalit ku ai shfaqet duke kryer marrëdhënie seksuale në zyrë me Alma Kaçin. Aktualisht, Gjici ndodhet në burg, nën masën e sigurisë arrest me burg për akuzën e korrupsionit pasiv. Në pamjet e publikuara, pas konsumimit të marrëdhënies intime me Alma Kaçin (po ashtu e arrestuar për korrupsion aktiv, tashmë nën masën e arrestit shtëpiak), shihet Gjici i cili i premton asaj një tender për sterilizimin e qenëve të rrugës.
