Ernest Muçi po kalon një moment fantastik, ndoshta momentin e tij më të mirë në karrierë deri tani. Ylli kuqezi është kthyer në një pikë referimi te Legia e Varshavës, thuajse në çdo ndeshje, si titullar apo zëvendësues, Muçi arrin të lerë gjurmë, duke dhuruar asiste apo shënuar gola fantastikë.
Sulmuesi arriti të ishte protagonist edhe në sfidën e fundit në kampionat ku shënoi një gol të bukur që i dha Legias një pikë, pas mbetjes me 10 lojtarë. Ndërkohë këtë vit ai është grumbulluar rregullisht me ekipin kombëtar, ku ka gjetur edhe golin e parë në fitoren me Ishujt Faroe.
Muçi u lakua gjatë merkatos së verës për një transferim të mundshëm në La Liga, ndërsa emri i tij pritet të rikthehet sërish në skenë gjatë merkatos së dimrit.
Te Legia besojnë se kanë në duar një xhevahir të vërtetë që pritet të sjellë në arkat e klubit miliona euro, për këtë është i bindur edhe drejtori sportiv i klubit, Jaçek Zielinski. I pyetur nëse Muçi mund të shitet më shumë se sa Ondrej Duda (4,2 milionë euro) dhe transferimi më i shtrenjtë i ligës, Zielinski theksoi: “Po, ai thjesht duhet të luajë më shpesh (qesh).
Tani për tani, Kosta (trajneri i Legias së Varshavës) po e përdor shumë mirë, ai është i mahnitshëm, por ku luan nga fillimi ndryshon. Muçi ka një potencial të madh”, u shpreh drejtori sportiv i Legias. Nga shitja e mundshme e Muçit do të përfitojë edhe Tirana pasi bardheblutë zotërojnë 20% të kartonit.
