Një plagosje me armë zjarri ka ndodhur këtë të hënë në Malësinë e Madhe. Sipas policisë, ngjarja ka ndodhur në vendin e quajtur “Qafa e Bardelecit”, në fshatin Vermosh, Malësi e Madhe, ku është plagosur me armë zjarri në dorë një 30 vjeçar.
Autori, Gjergj Marku 55 vjeç, është arrestuar. Sipas bluve, gjatë largimit, ai ka përplasur një automjet dhe ka kanosur me fjalë drejtuesin e tij që kishte ndihmuar të plagosurin.
Ngjarja dyshohet se ka ndodhur pas një konflikti për motive të dobëta.
Gjatë konfliktit, prezent ka qenë edhe bashkëshortja e 55-vjeçarit, e cila po ashtu është proceduar penalisht për kanosje ndaj personi që ndihmoi të plagosurin.
“Shërbimet e Policisë, pas njoftimit se në vendin e quajtur “Qafa e Bardelecit”, në fshatin Vermosh, Malësi e Madhe, ishte plagosur me armë zjarri një shtetas, kanë shkuar menjëherë në këtë adresë. Nga veprimet e para hetimore rezultoi se pas një konflikti për motive të dobëta, shtetasi Gj.M. kishte plagosur me armë zjarri pistoletë, në dorë, shtetasin M.P., 30 vjeç, i cili ndodhet jashtë rrezikut për jetën. Gjithashtu, shtetasi Gj.M. ka dëmtuar automjetin e shtetasit D.Q. dhe e ka kanosur atë, pasi i ka ofruar ndihmë shtetasit të plagosur. Pas disa minutash ndjekjeje, shërbimet e Policisë kanë kapur dhe vënë në pranga autorin e dyshuar, shtetasin Gj. M., 55 vjeç. Në vijim të veprimeve, nisi procedimi në gjendje të lirë për bashkëshorten e shtetasit Gj.M., shtetasen E.M., pasi ka qenë prezente gjatë konfliktit dhe ka kanosur shtetasin D.Q.”, thuhet në njoftimin e policisë.
