Kryeministri i Greqisë, Kyriakos Mitsotakis, ka folur sërish lidhur me rastin e Fredi Belerit, kryebashkiakut të zgjedhur të Himarës, i cili aktualisht ndodhet në burg nën akuzën për shit-bjerje vote.
Mitsotakis, në një deklaratë për mediat e huaja shprehet se mbajtja në qeli e Belerit ka lënë në hije marrëdhëniet dypalëshe mes Greqisë dhe Shqipërisë.
Mitsotakis shtoi se kjo çështje ka përmbysur progresin e bërë në marrëdhëniet mes dy vendeve dhe do t’i krijojë vështirësi Shqipërisë në procesin e anëtarësimit në BE.
Ai shtoi gjithashtu se është i shqetësuar nga fakti që Belerit nuk po i hepet mundësia për t’u betuar dhe shtoi se shpreson se do të gjendet një zgjidhje për këtë çështje.
“Çështja i lë në hije marrëdhëniet dypalëshe me Shqipërinë dhe përmbys progresin që kishim arritur. Më shqetëson veçanërisht fakti që edhe sot Shqipëria refuzon t’i japë atij mundësinë për t’u betuar si kryetar bashkie. Është një shkelje e qartë e së drejtës ndërkombëtare dhe do të ketë implikime më të gjera për përpjekjen e Shqipërisë për t’iu afruar familjes evropiane”, tha Mitsotakis.
“Uroj dhe shpresoj që së shpejti të gjendet një zgjidhje, nuk do të ndalem së ngrituri çështjen e Belerit në BE dhe te zoti Rama”, shtoi ai.
