Gjykata e Tiranës liroi nga qelia këtë të Enjte këngëtaren Ruenca Haxhia – e njohur si Enca, pavarësisht se prokuroria kërkoi caktimin e masës së arrestit me burg.
Ajo u arrestua dy ditë më parë për kultivim të kanabisit, pasi në banesën e saj u gjetën bimë narkotike të mbjella. Pesë vazo me bimë kanabisi të vendosura në ballkonin e vilës së këngëtares në Lundër u sekuestruan nga policia.
Gjatë seancën së sotme për masën e sigurisë, prokuroria kërkoi arrest me burg për këngëtaren. Mbrojtja nga ana tjetër kërkoi masë më të lehtë duke u shprehur se ajo nuk përbën rrezik për t’iu shmangur hetimit.
Sipas tyre, këngëtarja e ka mbjellë bimën “për kureshtje”.
Në fund të seancës, Gjykata e Tiranës caktoi masën “detyrim paraqitje” për Encën, e cila me këtë vendim lirohet nga qelia pas arrestimit nga efektivët e komisariatit 1.
Aksioni i bluve i koduar “Balcony”, siç njoftoi vetë policia të martën, erdhi “pas informacioneve të siguruara nga inteligjenca policore se një shtetase kishte kultivuar bimë narkotike, në ballkonin e banesës së saj”.
Teksa efektivët mësynë në banesën e Encës, aty ishte dhe i dashuri i saj – një shtetas i huaj, i cili u shoqërua nga policia dhe më pas u la i lirë.
Referuar materialit të referuar nga policia në prokurorinë e Tiranës, Enca Haxhiaj ka pranuar se është përdoruese e kanabisit. Ajo sqaronte se bimët i ka mbjellë vetë, për kuriozitet dhe për nevojat e saj personale. Në raport thuhet se bimët narkotike në ballkonin e banesës së këngëtares në katin e 4, në Lundër, kishin arritur nga 1.1 deri në 1.3 metër.
