Rëndohet bilanci i tragjedisë që shkaktoi stuhia “Daniel” në Libi. Ministria e Brendshme e Libisë Lindore bëri të ditur se numri i të vdekurve ka mbërritur në mbi 5 mijë, ndërkohë që më shumë se 10 mijë persona të tjerë konsiderohen të zhdukur.
Shifrat e viktimave mbeten kontradiktore, pasi Federata Ndërkombëtare e Shoqatave të Kryqit të Kuq dhe Gjysmëhënës së Kuqe tha kishin regjistruar deri më tani 2084 të vdekur.
Situata më e vështirë është në qytetin Derna, 1/4 e të cilit raportohet se u shkatërrua plotësisht pasi disa diga u çanë si pasojë e stuhisë dhe uji vërshoi në qytet.
Pamjet e publikuara në rrjetet sociale nga situata në këtë qytet janë vërtetë dramatike.
Rrugë janë të mbushura me viktima, ndërsa banorët kërkojnë të identifikojnë të afërmit e tyre.
Lagje të tëra të qytetit vijojnë të jenë nën ujë, i cili në zona të caktuara ka arritur deri në 3 metra lartësi.
Forca të shumta ushtarake dhe ato të Kryqit të Kuq dhe Gjysmë Hënës së Kuqe vijojnë përpjekjet për të shpëtuar sa më shumë njerëz, të cilët gjenden të bllokuar nëpër shtëpitë e përmbytura apo makina.
Autoritetet që qeverisin të dyja pjesët e vendit shpallën tre ditë zie për viktimat e kësaj tragjedie.
