Në fund të muajit korrik, aktori i njohur Genc Fuga pësoi një goditje në tru dhe iu nënshtrua një ndërhyrjeje kirurgjikale urgjente në një spital privat në Tiranë.
Ka qenë bashkëshortja e tij, Eni, e cila ka bërë me dije lajmin, ndërsa ka kërkuar prej miqve të tyre ndihmë për të kontribuuar me një vlerë monetare prej 200 lekësh të reja, në mënyrë që të mblidhen 19 mijë euro për operacionin.
Apelin e ka bërë në një postim në rrjetet sociale ku shkroi: “Nuk qenka e lehtë, por në këto momente e kam domosdoshmëri. Genci po kalon një periudhë të vështirë. Ka pësuar një goditje në tru dhe në këto momente po kryen ndërhyrje në Spitalin Amerikan. Do i lutesha të gjithë punonjësve të RTSH nëse munden dhe kush mundet të ofrojë një kontribut prej 200 Lekë të rinj për të patur mundësinë të kem shumën 19 mijë Euro të operacionit”.
Më pas aktorja e njohur, Eni, ka falenderuar të gjithë ata që ndihmuan që shuma të sigurohej, ku ndër të tjera shkroi: “Falenderim shpirti të gjithë njerëzve të thjeshtë që u bënë një me dhimbjen time. Faleminderit për cdo lutje të ndjerë tuajën që ma bëri zemrën dhe më të fortë. Faleminderit për cdo kontribut zemre që tek unë mori përmasa mrekullie, duke parë që në një kohë rekord shumë zemra që u bënë bashkë më dhanë frymë, besim, siguri. Përulem përpara dashurisë suaj, ashtu sic përulem në skenë përpara duartrokitjeve tuaja. Ju dua”.
Pas problemeve me shëndetin, Genc Fuga ia ka dalë dhe sot gëzon shëndet të plotë. Përmes një postimi të bërë në “Instastory”, në profilin e saj zyrtar, aktorja e “Njerëz dhe Fate”, ka publikuar një foto të Gencit teksa shoqëron vajzat e tij në ditën e parë të shkollës dhe sigurisht na ka ngrohur zemrat më këtë foto plot dashuri.
“Me babin në ditën e parë të shkollës”, shkruan bashkangjitur postimit Eni, fotografi të cilën e ka shoqëruar me ikonat e zemrës.
