Gazetari Ferdinand Dervishi ka njoftuar fundin e bashkëpunimit të tij profesional me televizionin “ABC” News. Në një postim në “FB”, gazetari bën me dije se ka pasur mosmarrëveshje me drejtuesit e televizionit pro qeveritar.
Dervishi i cili ka qenë ai që ka denoncuar vjedhjen e të dhënave nga sistemi TIMS, thotë se “dikushëve nuk u pëlqenin opinionet e deklarimet e mia, krejt pa autoceneurë, në panele televizive”.
Në reagimin në rrjetin social, ai lë të kuptohet se largimi nga “ABC” ka lidhje pikërisht me denoncimin e këtij skandali.
Gazetari shkruan:
Pas 13 vitesh bashkëpunim impenjativ sot u divorcova zyrtarisht me tv ABC. Nuk mund tu rezistoja më tepër ca mosmarrëveshjeve të nisura qysh nga janari i këtij viti edhe pse drejtuesit e rinj e vlerësonin emisionin tim si “emision luksi”. Duket dikushëve nuk u pëlqenin opinionet e deklarimet e mia, krejt pa autoceneurë, në panele televizive. Dikushëve, që duke ecur korridoreve të redaksisë, ngrinin zërin kur shqiptonin frazën: “Liria kushton!” E pra për mua liria ka qenë e mbetet e panegociueshme! Respekt për të gjithë shqiptarët që ndiqnin dhe pëlqenin dokumentarët e mi si dhe për ata që vlerësonin opinionet e mia publike! Me shpresë të ndërveprojmë me ndonjë projekt të ri! Ferdinand Dervishi.
P.S. Në foto duke bërë back up (jo si të sistemit TIMS) të kompjuterit personal, ku strehoheshin më tepër se 300 dokumentarë.
