Nga Boldnews.al
Në 26 Prill 2016, Policia Antidrogë e rajonit të Pontevedra, në Spanjë, shkatërroi një grup kriminal që trafikonte lëndë narkotike. Në bordin e një automjeti “Porche Cayenne”, të drejtuar nga shtetasi shqiptar, i identifikuar si Rinush G., u gjet rreth 54 kilogramë heroinë.
Në momentin e operacionit, sasia e heroinës së gjetur u konsiderua më e madhja e kapur për atë vit në të gjithë Europën.
Policia spanjolle arriti të arrestonte të paktën 6 persona, të përfshirë në këtë linjë trafiku nga Europa Qendrore drejt gadishullit iberik. Personi kyç, i konsideruar në mediat spanjolle edhe si “koka e grupit kriminal”, shqiptari Nikolin Janina, i shpëtoi operacionit.
Janina, një biznesmen i fuqishëm në Shqipëri, i cili ka në pronësi kompaninë “Porcelanosa”, u arrestua në atë kohë në Shqipëri. Por, për shkak të mungesës së një Marrëveshjeje ekstradimi mes Spanjës dhe Shqipërisë, ai u la i lirë.
Pak javë më parë, në korrik 2023, Nikolin Janina u ekstradua përfundimisht drejt Spanjës, bazuar në një Marrëveshje të nënshkruar mes qeverisë së Tiranës dhe asaj të Madridit, në prill të vitit 2022.
Ai është i vetmi që nuk është gjykuar për atë episod trafikimi. Gjashtë bashkëpunëtorët e tij-dy prej të cilëve shqiptarë dhe tre spanjollë-janë dënuar me nga 11 deri në 17 vjet, për një total prej 79 vitesh burgim, si edhe me gjobë që arrin deri në 9 milionë euro.
Si u zbulua grupi kriminal
“Boldnews.al” ka hulumtuar mbi raportimet e mediave spanjolle mbi arrestimin dhe ecurinë e hetimeve ndaj të ashtëquajturit “grup kriminal me Porche Cayenne”.
Grupi u emërtua në mënyrë të tillë pasi përdorte makinat e shtrenjta për trafikimin e heroinës nga vende të ndryshme të Europës drejt Spanjës.
Sipas dokumentave hetimore të Policisë dhe Prokurorisë spanjolle, rezulton se, më 24 shkurt 2016, shqiptari Rinush G. u nis me një Porsche Cayenne nga Barcelona në Gjermani. Më 18 mars ai lëvizi drejt Holandës për të siguruar lëndë narkotike heroinë.
Ajo lëndë narkotike-sipas hetimit-do t’i dorëzohej spanjollit Castor Manugel G.G dhe bashkëshortes së tij, Maria del Carmen C.D.
Vendi i dorëzimit ishte caktuar pranë një hoteli në qytetin Tui, ku shqiptari Rinush G. mbërriti më 19 mars.
Por, një ndërhyrje nga Policia Kombëtare Spanjolle prishi qëllimet e bandës, duke sekuestruar drogën e fshehur në një ndarje automjeti.
Aty u gjetën 54 pako cilindrike që përmbanin 53 kilogramë e 771 gramë heroinë.
Pas arrestimit në flagrancë të tre personave, Policia spanjolle vijoi operacionin, duke arrestuar edhe tre shtetas të tjerë- shqiptarin Sokol R. i cili konsideroj si përgjegjës për mbajtjen e shumave të parave dhe dy spanjollët e tjerë, Jose R.R dhe Marcos Antonio G.B.
Roli i Nikolin Janinës
Në dosjen gjyqësore që Prokuroria e Ponteverde paraqiti para Gjykatës së Porrinos jepen të dhëna mbi mënyrën e organizimit dhe funksionimit të grupit kriminal.
Prokuroria përshkruan se gjashtë të arrestuarit, së bashku me personin e arratisur (Nikolin Janina), ishin pjesë e “një organizate kriminale”, qëllimi i së cilës ishte “futja në Spanjë dhe më pas shitja mes konsumatorëve” e heroinës.
Sipas prokurorisë, ata kishin “një strukturë hierarkike” me “ndarje rolesh dhe funksionesh”.
Nga njëra anë ishte dega shqiptare, me kryetar Janinën dhe dy anëtarë të tjerë: Sokol R., “përgjegjës për marrjen e dërgesave të rregullta të parave” nga shitja përfundimtare e drogës në provincën e Pontevedra; dhe Rinush G., i cili, sipas prokurorit, ka qenë ai që ka transportuar drogën me makinë nga Evropa Qendrore në Galicia.
Nga ana spanjolle, vlerësohet se personi kyç ishte Castor Manuel.
Funksioni i tij, sipas Prokurorisë, ishte të shpërndante heroinën që rrjeti i dërgoi në provincën e Pontevedras, për të mbledhur më vonë pagesën për drogën nga “shkallët e ulëta” dhe për t’i çuar paratë në Barcelonë, për t’i dorëzuar në “kupolë” të rrjetit.
Gruaja e tij e shoqëronte në takime. Roli i saj ishte gjithashtu të “krijonte një pamje të ligjshmërisë dhe normaliteti” në ato udhëtime dhe takime. Dy të pandehurit e tjerë shpërndanin heroinën “ndër shitësit e fundit me pakicë të substancës”.
Pamje nga aksioni i policisë spanjolle në vitin 2016
Porcelanosa spanjolle: Nuk kemi lidhje me Janinën
Nikolin Janina u arrestua fillimisht në Shqipëri në vitin 2016 për llogari të autoriteteve spanjolle dhe u la i lirë disa muaj më vonë, për shkak se ai nuk mund të ekstradohej në mungesë të një Marrëveshje dy-palëshe Shqipëri-Spanjë.
Në maj të vitit 2022, menjëherë sapo u miratua Marrëveshje e ekstradimit mes dy vendeve, Nikolin Janina u arrestua sërish për llogari të drejtësisë në Spanjë.
Ky arrestim i dytë i tij u raportua edhe në median spanjolle, të cilët e konsideruan si bosin e “Porcelanosa Albania”.
Por, kompania e mirënjohur spanjolle “Porcelanosa”, deklaroi se Nikolin Janina as nuk është pjesë e grupit financiar dhe as nuk është person i autorizuar apo filial i saj në Shqipëri.
Kompania e Nikolin Janinës në Shqipëri, megjithëse prezantohet me emrin tregtar “Porcelanosa”, në fakt emrin e vërtetë e ka “Alba Ceramica”.
Është e paqartë se përse Janina ka zgjedhur të përdor emrin e kompanisë së njohur spanjolle. Por, kjo e fundit, mohon çdo lidhje me biznesmenin shqiptar.
Zv.presidenti i “Porcelanosa” në Spanjë, Silvestre Segarra, deklaroi në vitin 2022 për median e vendit të tij se “Janina, asnjëherë nuk ka qenë dhe nuk është pronar i Porcelanosa Albania” dhe “as nuk përfaqëson kompaninë apo mban ndonjë pozicion në të”.
Segarra citohet gjithashtu të ketë deklaruar se “personi i arrestuar ka blerë dhe shitur materiale të Porcelanosa në të shkuarën, por mes tyre nuk ka pasur marrëdhënie tregtare për të paktën 5 vitet e fundit.
Po ashtu, zv.presidenti i “Porcelanosa”, Segarra, ka deklaruar për median spanjolle se “djali i Nikolin Janinës, një rezident në qytetin Castellón të Almassora, blen pllaka nga marka të ndryshme, megjithëse ai nuk mban asnjë pozicion në firmën e tyre apo në të tjera”.
