Mosdeshifrimi i një skicimi me laps i hedhur në një letër të bardhë, ku tregohet plan-vendndodhja e disa objekteve ushtarake, është bërë shkak, që prokuroria e Elbasanit të shtyjë me 3 muaj të tjerë hetimin për tre Rusët e dyshuar për spiunazh të kapur në Uzinën e Çekinit në Gramsh.
Skicimi është gjendur tek sendet personale të Mikhail Zorin, dhe nga kçyrja me sy të lirë, të krijon përshtypjen e një reparti ushtarak, pasi në skicë pasqyrohet vend-rroja, kazermat, telat me gjemba dhe një derë me kangjella.
Mbi letrën e bardhë është dhënë një përshkrim me shkrim dore dhe në gjuhën Ruse.
Janë 8 përshkrime të tilla, të cilat prokuroria ka kontraktuar një përkthyer të gjuhën Ruse për të bërë përkthimin në gjuhën shqipe.
Por tashmë kur hetimet ndaj tre personave Mikhail Zorin, Fedir Alpatov dhe Svetlana Timofeva janë në 3 mujorin përfundimtar, prokuroria e Elbasanit ka kërkuar ndihmën e SPAK.
Kjo strukturë e posaçme, është përfshirë në këtë hetim duke dhënë asistencën e saj për sa i përket ekzaminimit kompjuterik të pajisjeve elektronike.
Bëhet fjalë për dy dronë, pajisje vëzhgimi për shikueshmëri natën, lap-top, disa karta telefoni dhe 6 aparate celularë, që u janë gjendur tre të huajve në momentin e arrestimit në 20 gusht 2022 në Elbasan.
Grupi i hetimit shpreson që ekspertët e SPAK të arrijnë të depërtojnë në e-mailet që kanë shkëmbyer së bashku dhe me persona të tjerë tre personat e proceduar për akuzën e “Sigurimit të informatave”.
Përmes kontrollit të e-maileve dhe rikuperimit të bisedave të zhvilluara në aplikacionet “Telegram” dhe “Whatsapp”, anëtarët e grupit të hetimit shpresojnë të zbulojnë diçka më tepër rreth misterit të shtetasve Rusë dhe Ukrainas, që u kapën vitin e kaluar në ish-uzinën e Prodhimit të Armëve në Gramsh.
Tre të rinjtë gjatë marrjen në pyetje kanë këmbëngulur se shkuan në bazën ushtarake të Gramshit, si të apasionuar mbas fotografimit të bazave të braktisura dhe pasionit si blogerë.
Por nga ana tjetër prokuroria ka ngritur dyshime ata janë të implikuar në spiunazh.
Ndërkohë në muajin Maj 2023, kryetarja e Gjykatës së Elbasanit, Matilda Fetahu, vendosi ndaj Mikhail Zorin masën nga “arrest në burg” në “arrest shtëpie”, kurse për Timofevën e Alpatovin, detyrim paraqitjeje tek një oficer i policisë gjyqësore, deri në mbyllje të hetimeve.
/Ora News/
