Kthesë në hetimet për shpërthimin në Selenicë, ku humbi jetën Durim Gllucaj, 56-vjeç. Ngjarja ndodhi një ditë më parë në banesën e 56-vjeçairt, në oborrin e së cilës shpërtheu soba me gaz. Në një njoftim paraprak, nga policia u tha se ngjarja ishte aksidentale. Ndërkohë, këtë të shtunë njoftohet se hetimet e mëtejshme kanë zbuluar se ngjarja ishte e qëllimshme dhe bëhet fjalë për një krim në familje.
Sipas të njëjtave burime, djali i viktimës vendosi tritol te soba me gaz në shenjë hakmarrje, pasi i ati e dhunonte. Dyshohet se sapo babai i është afruar sobës, djali e ka shpërthyer përmes një mekanizmi elektrik.
Mato Gllucaj, 23-vjeç, u arrestua.
“Në vijim të veprimeve të thelluara hetimore për ngjarjen e ndodhur mëngjesin e djeshëm, në territorin e jashtëm të banesës së shtetasit D.G., ngjarje e cila fillimisht u dyshua si aksidentale, grupi hetimor siguroi prova që krijonin dyshime se ngjarja mund të mos ishte aksidentale. Si rezultat i veprimeve të thelluara hetimore u vu në pranga autori i dyshuar shtetasi M.G., 23 vjeç, djali i 56-vjeçarit që humbi jetën nga shpërthimi në territorin e jashtëm të banesës së tij. 23-vjeçari dyshohet se për shkak të dhunës së vazhdueshme që babai ka ushtruar ndaj tij, ka vendosur lëndë plasëse në sobën me gaz, në oborrin e banesës, nga shpërthimi i së cilës humbi jetën 56-vjeçari”, njoftoi policia.
Në cilësinë e provës materiale janë sekuestruar mekanizmi elektrik me të cilin është realizuar shpërthimi.
Po, ashtu nga policia janë sekuestruar edhe: 25 granata dore difensive, 37 kallëpe me lëndë plasëse tritol (me peshë 400 gr. secila), 43 kapsolla detonatore, 5 ndezësa granatash, 1 armë zjari pushkë, 1 celular, 2 thika, 310 fishekë luftarakë, 12 krehra për armë zjarri, 2 radio marrëse-dhënëse, kapuça dhe veshje për mbulimin e fytyrës dhe mjete për punime elektrike me ngjitje.
