Një aksident automobilistik është regjistruar pasditen e kësaj të shtune në aksin rrugor “Korçë-Pogradec”, ku për pasojë kanë mbetur të plagosur tre persona.
Autoritetet policore bëjnë me dije se shtetasi R. H., 34 vjeç, banues në fshatin Vreshtas, Maliq, duke drejtuar automjetin tip “Benz”, dyshohet se ka humbur kontrollin mbi drejtimin e tij dhe automjeti ka dalë nga rruga.
Si pasojë e aksidentit kanë mbetur të plagosur shoferi 34-vjeçar dhe dy pasagjerë të automjetit, shtetasit M. B. dhe B. B., të cilët u transportuan për mjekim në spitalin e Korçës, ku ndodhen jashtë rrezikut për jetën. Ngjarja ka ndodhur rreth orës 15:10, pranë fshatit Veliternë të Maliqit.
Grupi hetimor po punon për zbardhjen e rrethanave të aksidentit.
