Një i ri është arrestuar nga policia e Sarandës pasi akuzohet se shpërndante drogë në lokalet e natës në qytetet.
21-vjeccari me iniciale A.D. është ndaluar teksa ishte duke lëvizur me një automjet me një tjetër person. Në pranga u vu dhe ky i fundit për moskallëzim krimi.
Në makinë dhe gjatë kontrollit fizik të 21-vjeccarit u gjetën kokainë, një pistoletë pa leje dhe një shumë parash.
Aksioni i koduar “koordinatat”, sipas bluve, erdhi bazuar në inteligjencën policore se një shtetas qarkullonte me automjet, i armatosur, dhe shpërndante lëndë narkotike.
“Gjatë operacionit, në aksin rrugor “Sarandë – Ksamil”, pranë gjirit të Hartës, shërbimet e Policisë kanë lokalizuar automjetin e dyshuar tip ‘Benz dhe kanë ndërhyrë për ta bllokuar. U bë bllokimi i automjetit, kapja në flagrancë e drejtuesit, shtetasit A. D., 21 vjeç, banues në Rusan, Delvinë dhe e pasagjerit, shtetasit A. B., 22 vjeç, banues në Sarandë. Gjatë kontrollit fizik ndaj shtetasit A.D. dhe kontrollit në automjet, u gjetën dhe sekuestruan në cilësinë e provës materiale një armë zjarri pistoletë me municion luftarak, një sasi dozash kokaine dhe një shumë të konsiderueshme parash (3 180 euro dhe 45 000 lekë). Në vijim të veprimeve, gjatë kontrollit në banesën e shtetasit A.D., u gjetën dhe sekuestruan një armë gjahu të cilën ky shtetas e mbante pa leje, si dhe 460 fishekë luftarakë”, njoftoi policia.
Nga veprimet hetimore dhe nga informacionet e siguruara nga inteligjenca policore, shtojnë të njëjtat burime, rezulton se 21-vjeçari shpërndante lëndë narkotike kokainë, në Sarandë dhe në Ksamil, kryesisht në lokalet e natës, ndërsa 22-vjeçari ka patur dijeni për veprimtaritë e tij kriminale, por nuk ka kallëzuar në Polici.
