Një 29-vjeçar është arrestuar për zhdukjen e Leonard Thodhorit dhe Fatmir Sulovarit, të cilët humbën kontaketet me familjarët që prej 9 prillit të këtij viti. Lidhur me këtë ngjarje është shpallur në kërkim një 25-vjeçar.
Në pranga u vu Albi Meçini, 29 vjeç, i dënuar më herët i dënuar më parë për dhënie ndihmë 4 personave (Admir Tafili, Fran Marashi, Gëzim Gora, Artur Gora) për largim nga burgu i Drenovës – ngjarja e bujshme e ndodhur në nëntor të 2013-ës.
Albi Meçini dyshohet po ashtu se do të kryente një atentat në bashkëpunim me dy persona të tjerë, të shpallur gjithashtu në kërkim.
“Do kryente atentat”
Aksioni për ndalimin e tij u krye nga policia e Fierit. Blutë njoftuan se i riu me banim në Kamzë u ndalua në aksin rrugor “Mbrostar-Fier”. Policia sekuestroi 2 çanta brenda të cilave ishin 2 pako me rreth 21.3 kilogramë lëndë plasëse artizanale, të montuara me celularë, për shpërthim në distancë. Te dyja çantat u gjetën në afërsi të automjetit që sipas bluve, përdorej nga Meçini.
Gjithashtu, nga kontrolli i zonës ku u kap 29-vjeçari, u gjet një tjetër automjet në brendësi të të cilit ishin 3 bidona me lëndë djegëse benzinë. Nga veprimet hetimore rezulton se 29-vjeçari, në bashkëpunim me shteasit Arafat Manërkolli, 27 vjeç, banues në Dibër dhe Ervis Cukali, 25 vjeç, banues në Tiranë (të cilët u shpallën në kërkim), kishin siguruar kushtet dhe mjetet, me qëllim kryerjen e një atentati.
Policia sekuestroi 2 automjetet, 2 çantat me rreth 21.3 kg lëndë plasëse artizanale, e montuar me celularë, për shpërthim në distancë, 3 bidonë me benzinë dhe 4 celularë.
Autor i zhdukjes së dyfishtë në Sarandë
Albi Meçini, sipas hetimeve, rezulton i përfshirë edhe në rrëmbimin e dy personave në Sarandë disa muaj më parë.
“Në vijim të veprimeve hetimore të kryera nga Policia e Fierit, në bashkëpunim me Policinë e Vlorës, në funksion të një procedimi penal të iniciuar nga DVP Vlorë, për zhdukjen e shtetasve Leonard Thodhori dhe Fatmir Sulovari, zhdukje e raportuar në Policinë e Sarandës, më datë 09.04.2023, rezultoi se shtetasi i arrestuar në flagrance, me çantat me lëndë plasëse, është autor i dyshuar për këtë rast, së bashku me shtetasin Sebastian Lataj, 25 vjeç, i cili u shpall në kërkim”, njoftoi policia.
Për Meçinin dhe Latajn, ditën e sotme, Gjykata e Sarandës ka caktuar masën e sigurisë “Arrest në burg” për veprën penale “Rrëmbimi ose mbajtja peng e personit”.
