Një 28-vjeçar grek është arrestuar nga policia në Kapshticë, pasi akuzohet se ka shfrytëzuar për prostitucion një bashkatdhetare 30-vjeçare.
Kjo e fundit ndërkohë u procedua për ushtrim të prostitucionit.
Aksioni i koduar “Indicia” erdhi pasi një hetimi disajavor me metoda proaktive, konfirmuan burime zyrtare.
“Specialistët e Seksionit për Hetimin e Narkotikëve dhe Trafiqeve të Paligjshme të DVP Durrës, pas një hetimi proaktiv, disajavor, të ndjekur në bashkëpunim me Prokurorinë e Durrësit, finalizuan operacionin policor të koduar ‘Indicia’. Në kuadër të këtij operacioni, në bashkëpunim me Policinë Kufitare të Kapshticës, u kap gjatë tentativës për t’u larguar nga vendi ynë, shtetasi F. P., 28 vjeç, banues në Greqi. Nga hetimet ka rezultuar se 28-vjeçari, gjatë këtij muaji, ka shfrytëzuar për prostitucion një 30-vjeçare nga Greqia, ndaj së cilës filloi procedimi në gjendje të lirë për veprën penale ‘Prostitucioni’”, njoftoi policia.
“Gjithashtu, nga veprimet hetimore dyshohet se një shtetas ende i paidentifikuar, i ka vjedhur 30-vjeçares, një shumë parash. Vijon puna për identifikimin, kapjen dhe arrestimin e tij”, shtuan të njëjtat burime.
