Kristian Mba dhe Eros Grezda janë dy problemet më të mëdha për stafin mjekësor të Partizanit para ndeshjes së të enjtes ndaj Astanës, vendimtare për objektivin e kualifikimit në grupet e Ligës së Kampioneve.
Kërkohet përmbysja e humbjes minimale në sfidën e parë dhe në këtë mision këta dy emra padyshim janë të dobishëm, në një kohë kur Mensah dhe Da Silva nuk pritet të jenë të gatshëm. Lajmet e mira vijnë nga Grezda.
Pas kryerjes së ekzaminimeve mjekësore, sulmuesi ka rezultuar se nuk ka tërheqje muskulore, çka është një çlirim i madh për vetë lojtarin, por edhe për klubin.
Problemi muskulor i shfaqur në ndeshjen ndaj Astanës, ka rezultuar të jetë vetëm një kontraktim për shkak të lodhjes.
Sulmuesi ditën e djeshme ka zbritur në fushë dhe mbetet të shihet se si do të avancojë me riaftësimin e tij. Ndërkohë, situata vijon të jetë e njëjtë për Mbaë, i cili stërvitet i veçuar.
Nuk ka asnjë garanci që ai mund të jetë në fushë të enjten, por bashkë me stafin mjekësor, po punon fort për të rikuperuar në kohë problemin me muskujt e barkut.
