“Arrest me burg” do të jetë masa e sigurisë që Prokuroria e Tiranës do të kërkojë për Eldi Allushin, pronarin e mjetit luksoz “BMW X6” që u përplas të martën me digën e Liqenit Artificial.
26-vjeçari nga Durrësi që do të dalë të shtunën para gjykatës akuzohet për 3 vepra penale lidhur me aksidentin.
Referuar dosjes hetimore, Eldi Allushi ka ndryshuar dëshmi pasi fillimisht dha një dëshmi kontradiktore, ku tha se i kishte ngecur pedalja e gazit në momentin që makina “fluturoi” me shpejtësi skëterrë nga rruga e Kosovarëve mbi pedonalen e digës së Liqenit.
Sipas dosjes, rezulton se i riu nuk ka qenë fare në makinë në momentin kur ka ndodhur aksidenti, pasi mjeti “BMW X6” drejtohej nga Emiljano Nina, që është shpallur në kërkim për 7 vepra penale dhe pasagjer ishte vetëm Jurgen Allushi, kushëriri i Eldi Allushit.
Para hetuesve, Eldi Allushi ka treguar se fillimisht dha dëshmi të reme për shkak se nuk donte që t’i bënte keq Emiljano Ninës, i cili sipas tij ia kishte kërkuar makinën sepse do të dilte me një shoqe.
Ndërkohë, në telefon gjatë komunikmit fillestar me hetuesit Eldi Allushi u ka ka thënë atyre se nuk ka konsumuar alkool, por një cigare hashash pasi ishte në shoqërinë e një femre.
Ky deklarim sipas hetuesve ka rezultuar të jetë alibi për të fshehur të vërtetën e aksidentit.
“Si tregova policisë se s’doja ti bëja keq Emilianos. Ai ma kërkoi makinën dy herë për të marre një shoqe dhe unë ja dhashë. Emiliano pasi erdhi nga aksidenti fjeti gjumë, mua s’më tregoi. Më mori në telefon një oficer policie dhe i thashë qe do paraqitem vetë në polici. Për 5 ore nuk u paraqita në polici pasi kisha frikë. Automjetin ma bëri dhuratë xhaxhai im disa kohë më parë”, është shprehur Allushi.
Nga ana tjetër, kushëriri i tij ka treguar se Nina ishte nënë efektin e alkoolit kur ndodhi aksidenti pasi kishte konsumuar 3 birra, ndërsa ai kishte pirë vetëm një shishe ujë.
Emiljano Nina është ende në kërkim teksa policia po punon për lokalizimin dhe kapjen e tij.
