Një sindikatë shqiptare e krimit në fushën e narkotikëve është goditur nga policia në Viktoria të Australisë, duke çuar pas hekurave pronarin e 5 fermave të kanabisit.
Aksioni anti-drogë është udhëhequr nga njësia speciale “VIPER”, duke çuar në arrestimin e 47-vjeçarit shqiptar Ditan Ndreu (Dritan Ndreu) me banim në “Taylors Hill”, i cili dyshohet se është koka e rrjetit kriminal.
Bashkë me të është vënë në pranga edhe një grua 44-vjeçare me origjinë kolumbiane, e cila dyshohet se ishte e angazhuar në kultivimin e bimëve.
Në total janë lëshuar pesë urdhër-arreste, ndërsa gjatë kontrolleve në banesa janë sekuestruar edhe 200,000 dollarë.
Policia ka zbuluar pesë shtëpi ku kultivohej kanabis. E para u zbulua në “Taylor Lakes” ku u gjetën 260 bimë, një tjetër në “Deer Park” me 185 bimë dhe një banesë në “Rockbank” me 200 bimë kanabis dhe një pronë në “Greenvale” ku u gjetën 100 bimë kanabisi.
Më pas në 23 gusht u zbulua një tjetër pronë, këtë herë në “Keilor East”, ku kultivoheshin 180 rrënjë kanabisi.
Në total janë sekuestruar rreth 1 ton kanabis me vlerë gati 5 milionë dollarë.
Hetimi për grupin e shqiptarëve ka nisur në qershor të këtij viti pas lëvizjeve të dyshimta në zone. Prokurorë australianë janë duke vijuar punën për zbulimin e personave të tjerë të lidhur me këtë grup kriminal.
