Në Itali vijon debati mes atyre që vlerësojnë pushimet në Shqipëri si eksperiencë pozitive dhe me kosto të ulët, e pjesës tjetër që pretendojnë se janë mashtruar nga çmimet përshkrimi si “Maldivet e Europës” në rrjetet sociale.
Pjesë e këtyre diskutimeve është bërë edhe biznesmeni i njohur Flavio Briatore, i cili ka drejtuar skuderinë “Renault” në kohët e arta të saj në Formula 1.
Briatore teksa ishte i ftuar në emisionin “Zona Bianca” u shpreh se do të zgjidhte Shqipërinë për të kaluar këto ditë të nxehta gushti, duke vlerësuar shërbimin dhe detin, që siç tha ai është njësoj si në jug të Italisë dhe mikpritja është e jashtëzakonshme.
Biznesmeni 73-vjeçar, i njohur për jetën e pushimet luksoze pohoi se e njeh shumë mirë Shqipërinë dhe se nuk do kishte asnjë problem të vinte të pushonte në bregdetin tonë.
“Pushimet në plazh në Shqipëri, deti atje është i njëjtë me atë që kemi në Puglia, Sicilia, Calabria, nuk ndryshon shumë.Unë e njoh mirë Shqipërinë, shërbimet janë shkëlqyera. Unë besoj se secili duhet të shtrijë këmbët sa ka jorganin. Për fat të keq në Itali ka pasur rritje të mëdha çmimesh. Unë do shkoja pa asnjë problem t’i bëja pushimet në Shqipëri. Atje ka një det shumë të bukur. Shqipëria është pak a shumë si Italia 10-20 vite më parë, Rimini, Riçione, mikpritje e jashtëzakonshme. Nuk kam asnjë problem t’i bëj pushimet në Shqipëri”, tha Briatore në emisionin ‘Zona Bianca’ në Rete4.
