Një person është arrestuar nga policia në Patos, që ka sekuestruar një sasi lënde narkotike.
Në pranga u vu Ergest Faslliaj, 39 vjeç, banues në Margëlliç, Patos, në kuadër të një aksioni antidrogë i koduar “Vëzhgimi”. Aksioni nga policia dhe prokuroria e Fierit erdhi pas hetimeve disamujore, konfirmuan burime zyrtare.
“Gjatë kontrolleve të ushtruara në lokalin në pronësi të 39-vjeçarit, shërbimet e Policisë gjetën dhe sekuestruan në cilësinë e provës materiale, 298 doza të dyshuara të lëndës narkotike kokainë, një sasi të konsiderueshme perzirësish për këtë lëndë, një peshore elektronike, një shumë parash të dyshuar të përfituar nga shitja e dozave të lëndës narkotike, 1 këllëf pistolete dhe 2 celularë”, njoftoi policia.
Në këto kushte, Faslliaj u arrestua për veprat penale “Prodhimi dhe shitja e narkotikëve”, “Përshtatja e lokalit për përdorim droge” dhe “Nxitja për përdorimin e drogës”.
