Vdekja e dy tursitëve italianë, Gritto Domenico dhe Vicenzo Tizziano, motori “Honda” i të cilëve u ppërplas nga një “Mercedes Benz” që drejtohej nga një 17-vjeçar pa patentë në aksin Sarandë-Ksamil, ka bërë që pezullohet nga detyra shefi i Policisë Rrugore të qytetit.
Drejtori i Përgjitshëm, Muhamet Rrumbullaku ka marrë vendimin të pezullojë menjëherë nga detyra shefin e Seksionit të Policisë Rrugore në Komisariatin e Policisë Sarandë, Nënkomisar A. Sh.
“Pezullimi i tij u bë në zbatim të nenit 209, të Rregullores së Policisë së Shtetit, për shkelje të rëndë të kompetencave të Policisë, në lidhje me pasojat e aksidentit të ndodhur në orët e para të mëngjesit të sotëm, në aksin rrugor “Sarandë –Ksamil”, ku humbën jetën 2 turistë italianë, konkretisht shtetasit D. D., 24 vjeç dhe V. T., 32 vjeç”, thuhet në njoftim.
Ai po ashtu ka urdhëruar ngritjen e një grupi të posaçëm, me specialistë nga Drejtoria e Standardeve Profesionale dhe nga Departamenti për Sigurinë Publike për të analizuar rastin dhe për të nxjerrë përgjegjësitë në lidhje me shkakun e ndodhjes së këtij aksidenti.
Gjithashtu, ka nisur një hetim administrativo-disiplinor për të gjithë zinxhirin komandues të Sektorit të Policisë Rrugore në Drejtorinë e Policisë Vlorë, për mospërmbushje të procedurave standarde të punës, në lidhje me marrjen e masave për parandalimin e aksidenteve rrugore, gjatë sezonit turistik.
