Një ditë pas aksidentit sa të çuditshëm aq ehe tronditës që ndodhi te diga e Liqenit Atificial, policia ka zbardhur plotësisht ngjarjen, duke zbuluar se 26-vjeçari nga Durrësi, Eldi Allushi nuk ka qenë në timonin e BMW-së luksoze.
Pavarësisht se u shoqërua ditën e djeshme pasi u zbulua se ishte larguar nga vendngjarja duke hequr edhe targat e makinës pas aksidentit të ndodhur rreth orës 05:15 të mëngjesit, Allushi nuk ka qenë duke drejtuar mjetin.
Për më tepër në makinë me të kanë qenë dy persona të tjerë, njëri prej të cilëve, Emiljano Nina, i njohur si kushëriri i mbretit të lojërave të fatit Ervis Martinaj.
28-vjeçari problematik, sipas policië, drejtonte mjetin “BMW X6” në momentin kur doli nga rruga e Kosovarëve dhe “fluturoi” mbi skarpatet e digës së liqenit, për të përfunduar e përplasur me muret anësore të digës mbi pedonale.
Po ashtu në mjet, ndodhej edhe shtetasi i identifikuar si Jurgen Allushi, i cili është ndaluar nga policia.
Mësohet se pas aksidentit Nina është larguar nga vendngjarja me ndihmën e pronarit të mjetit Eldi Allushi, i cili u ndaluar vetëm në orët e pasdites së të martës.
Dyshohet se 28-vjeçari që drejtonte “BMW X6” ka pësuar lëndime pas aksidentit, por me gjithë kontrollet e policisë ai nuk është gjetur në asnjë spital apo klinikë në kryeqytet, por mendohet se ka marrë mjekim në Fier.
Policia fillimisht ndaloi 26-vjeçarin Eldi Allushi pasi leja e qarkullimit të mjetit të aksidentuar ishte në emrin e tij, por pas shoqërimit evidentoi se i riu durrsak nuk kishte asnjë lëndim në trup, pavarësisht se përplasja me murin anësor të digës ka qenë e fortë.
Gjatë arrestimit të Allushit janë sekuestruar shkopa bejsbolli dhe sende të tjera të paligjshme.
Sa i përket te shkuares se Emiljano Ninës, ai është një emër i njohur për policinë, pasi është përfshirë në disa ngjarje kriminale, ndërsa pas aksidentit u lëshuar një urdhër arresti për të.
Në vitin 2015, ai u shpall në kërkim nga policia për një ngjarje të rëndë kriminale të ndodhur në Tiranë. Bëhet fjalë për vrasjen e 30-vjeçarit Enton Nikaj që ndodhi në nëntor në parkingun e një restoranti në Linzë, ku mbeti i plagosur edhe pronari i biznesit.
Nina, në atë kohë 20 vjeç, u shpall në kërkim si person i dyshuar për përfshirje në vrasje. Pasi u shoqërua nga policia për këtë ngjarje, u la i lirë sepse u provua se nuk rezultonte të kishte gisht në krim.
Ndërkohë, Blutë kanë bërë arrestimin e Eldi Allushit, i cili ka dhënë dëshmi të rreme para hetuesve, pasi pretendoi se ishte ai shoferi i “BMW X6” dhe se në momentin e aksidentit i ka mbetur këmba e stakuar te pedali i gazit të mjetit luksoz.
Njoftimi i policisë:
Specialistët e Qarkullimit Rrugor, në vijim të veprimeve procedurale për aksidentin e ndodhur rreth orës 05:15, të datës 22.08.2023, në Rrugën e Kosovarëve, kanë arrestuar shtetasin:
-Eldi Alushi, 26 vjeç, banues në Durrës, për veprat penale “Moskllëzimi i krimit”, “Veprime që pengojnë zbulimin e së vërtetës” dhe “Përkrahja e autorit të krimit”;
-kanë referuar materialet në Prokurori ku ka nisur procedimi në gjendje të të lirë për shtetasin Jurgen Allushi, 25 vjeç, për veprën penale “Moskallëzimi i krimit”;
– kanë shpallur në kërkim shtetasin Emiljano Nina, 28 vjeç, banues në Tiranë, për veprat penale “Shkelja e rregullave të qarkullimit rrugor”, “Drejtimi i automjetit në mënyrë të parregullt”, “Largimi nga vendi i aksidentit”, “Shkatërrimi i pronës”, “Moskallëzimi i krimit”, “Veprime që pengojnë zbulimin e së vërtetës” dhe “Prodhimi, mbajtja, blerja apo shitja pa leje e armëve të ftohta”.
Nga veprimet hetimore dyshohet se shtetasi Emiljano Nina, duke drejtuar automjetin “BMW”, në pronësi të shtetasi Eldi Alushi, për shkak të shpejtësisë shumë të lartë, ka humbur kontrollin dhe për pasojë automjeti ka dalë nga rruga dhe është përplasur me bordurën anësore, te Liqeni Artificial. Pasagjer në këtë automjet ka qenë shtetasi Jurgen Allushi, i cili pas aksidentit, është larguar bashkë me drejtuesin e automjetit.
Shtetasi Emiljano Nina ka përkrahur drejtuesin e automjetit dhe ka penguar në zbardhjen e rrethanave të ngjarjes, duke dhënë dëshmi të rreme në lidhje me rrethanat e aksidentit.
Në cilësinë e provës materiale është sekuestruar një shkop bejsbolli që është gjetur në banesën e shtetasit Emiljano Nina. Policia vijon kontrollet për kapjen dhe arrestimin e këtij shtetasi.
