Pushimet për sulmuesin e kombëtares shqiptare Rei Manaj kanë ardhur drejt fundit, ndërsa tanimë ka nisur një aventurë të re. 26-vjecari ka nënshkruar një kontratë me skuadrën e Sivasspor në superligën turke, ndërsa zyrtarizimi është bërë këtë të martë. Manaj ka firmosur për 3 sezone, teksa ditën e premte do të kryejë testet mjekësore, e më pas të jetë në dispozicion të trajnerit.
Kujtojmë se Rei Manaj prej afro 1 viti ishte pa skuadër, ndërsa aventura e tij tek Watford në Angli, u mbyll më shpejt se çpritej. Shqiptari zhvilloi atje vetëm 6 paraqitje, ku nuk mundi të shënonte asnjë gol. Pavarësisht formës së tij të luhatshme, ofertat nuk munguan. Skuadra nga La Liga, por edhe Sampdoria e Frosinone nga Serie A kërkuan shërbimet e sulmuesit, ndërsa nuk pati akord mes palëve.
Turqia është një mundësi shumë e mirë për sulmuesin shqiptar që të tregojë vlerat e tij, ndërsa konkurrenca është padyshim e madhe. Skuadrat si Fenerbahce, Galatasaray apo Besiktas janë fuqizuar së tepërmi, ndërsa Sivasspor e ka nisur mirë sezonin me 1 fitore dhe 1 barazim në dy ndeshjet e para. Rei Manaj është cilësuar si një ndër talented më të mëdhenj shqiptar, ndërsa më parë ka veshur fanellën e Interit dhe më pas kaloi tek Barcelona.
