Një minator është plagosur rëndë teksa punonte në një minierë në Bulqizë. Ngjarja ka ndodhur pasditen e djeshme, ndërsa është raportuar fillimisht nga mediat këtë të martë, që kanë përcjellë denoncimet e familjarëve të 60-vjeçarit Shyqyri Çela.
Sipas tyre, minatori është është lënë në hyrje të spitalit në Dibër dhe më pas, kur është konstatuar, është nisur me urgjencë drejt Traumës.
Lidhur me ngjarjen, me një njoftim paraprak doli edhe policia lokale, por vetëm pas raportimit në media dhe me një vonesë një ditore.
“Rreth orës 19:30 të mbrëmjes së djeshme, është paraqitur për të marrë ndihmë mjekësore, në spitalin e Peshkopisë, shtetasi Sh. C., 60 vjeç, me profesion minator, i punësuar në një subjekt minerar, në Bulqizë. 60-vjeçari është transportuar për ndihmë më të specializuar, në Spitalin e Traumës, Tiranë. Grupi hetimor, në drejtimin e Prokurorisë, po vijon hetimet e thelluara, për zbardhjen dhe dokumentimin e plotë të rrethanave të këtij rasti”, thuhet në njoftimin e policisë së Dibrës, pa dhënë të tjera detaje rreth rastit.
Aksidentet në punë e sidomos në miniera janë një realitet shqetësues në vend. Raportimet mediatike kanë zbuluar se aksidentet në punë janë të nën raportuara dhe vetëm pak prej kompanive që gjenden në shkelje ndëshkohen, ndërsa faji u mbetet viktimave.
Vetëm javën e kaluar, tre minatorë u plagosën pas një shpërthimi gazi po në një minierë në Bulqizë, ku incidentet gjatë orarit të punës janë kthyer në një normalitet.
