Deputeti i PDK-së në Kosovë, Hisen Berisha, thotë se arrestimi në Tiranë i ish-pjesëtarit të UÇK-së, Dritan Goxhajt, bie ndesh me të drejtat e njeriut. Në një intervistë në “News24”, ai apeloi që qeveria shqiptare të kërkojë llogari nga Këshilli i Evropës për pretendimet e tyre mbi Shtëpinë e Verdhë.
Berisha shtoi se UÇK-ja ka bërë një luftë të drejtë, dhe ka respektuar të gjithë normat ndërkombëtare aq sa ka patur mundësi.
“Arrestimi i Goxhajt bie ndesh me të drejtat e njeriut, është shkelje e tyre. Unë mendoj se qeveria shqiptare nuk duhet të lejojë ekstradimin e Dritan Goxhajt. Duhet të kërkojë llogari nga Këshilli i Evropës për pretendimet mbi Shtëpinë e Verdhë.
UÇK-ja ka respektuar gjithë normat ndërkombëtare aq sa ka pasur mundësi, dhe besoj se në asnjë rast nuk kemi dalë kundër tyre. UÇK-ja ka bërë një luftë të drejtë. Ne duhet të bëjmë çdo gjë për të ndalur këtë abuzim. Raporti i Dick Martyt është e keqja më e madhe që i është bërë Kosovës pas luftës. Kjo gjë ka prekur edhe Shqipërinë”, u shpreh ai ndër të tjera.
Dy ditë më parë, Gjykata e Apelit e Juridiksionit të Përgjithshëm la në “arrest me burg” Dritan Goxhaj, ish-ushtarin e UÇK-së i arrestuar më 31 korrik 2023, me urdhërarrest të lëshuar nga Gjykata Speciale në Hagë.
