Një infermiere britanike është shpallur fajtore për vrasjen e shtatë fëmijëve të porsalindur dhe për tentativën për të vrarë gjashtë të tjerë në njësinë e neonatologjisë, në spitalin e Çesterit.
Vdekjet e foshnjave kanë ndodhur nga qershori i vitit 2015 deri në qershor të vitit 2016.
33-vjeçarja, Lucy Letby doli në gjyq për herë të parë në tetorin e vitit të kaluar. Ajo u akuzua se kishte injektuar viktimat – foshnje të cilat ose ishin të sëmura ose kishin lindur para kohe – me ajër, i ka mbiushqyer me qumësht dhe i ka helmuar me insulinë.
Një juri në Gjykatën Mbretërore të Mançesterit e gjeti atë fajtore pasi për 22 ditë kishte shqyrtuar provat e prokurisë që rëndonin mbi Letby.
Prokuroria tha se Letby kishte “kalkuluar” gjithçka dhe kishte përdorur metoda të vrasjes “që nuk lënë shumë gjurmë pas”.
Gjatë gjykimit janë dëgjuar edhe dëshmitë e kolegëve të infermieres, të cilët thanë se kishin vërejtur se Letby kishte qenë në punë në çdo rast kur foshnjat e porsalindura kishin vdekur.
Gjatë kontrolleve në shtëpinë e saj, policia kishte gjetur dokumente të spitalit dhe shënime të shkruare prej saj, ku në një prej tyre thuhej: “Jam e ligë, unë e kam bërë këtë”.
Infermierja ka mohuar akuzat dhe ka sugjeruar se një “bandë” prej katër mjekësh po tentonin që t’ia hidhnin fajin asaj për shkak të dështimeve të spitalit sa i përket përkujdesjes së foshnjave.
