Xhovani Kolela, ish-drejtuesi i skuadrës së Partizanit, snobon të kuqtë dhe ngre në qiell Egnatian.
Sipas trajnerit kampion të Shqipërisë, i cili ndoqi sfidën mes Interit dhe Egnatias, rrogozhinasit janë ekipi për t’u mundur këtë sezon. Në një intervistë për “Top Channel”, italiani, i cili ka drejtuar të kuqtë për një vit, foli më shumë për ekipin shqiptar nga Rrogozhina sesa sukseset e ish-skuadrës së tij, Partizanit.
“Ishte një ndeshje shumë e mirë dhe (Egnatia) rezistoi dinjitoze përballë një kundërshtari të tillë. Komplimente për djemtë dhe trajnerin e Egnatias. Nuk di asgjë se çfarë ka ndodhur te Partizani, kjo mes Egnatias dhe Interit është ndeshja e parë që shoh për këtë sezon”, tha ish-trajneri i të kuqve.
Më pas Kolela foli edhe për rikthimin e mundshëm në Shqipëri.
“Nuk e di. Për momentin jam duke vlerësuar disa oferta që kam, por po i shoh me qetësi. Mund të përsëris vetëm edhe një herë se kjo Egnatia ishte një skuadër shumë e mirë dhe për mua do të jetë në garë për titullin”, tha Xhovani Kolela, ish-trajner i Partizanit.
Kolela, përpara se të drejtonte Partizanin dy vite më parë, në vitin 2020 kishte drejtuar edhe Apoloninë e Fierit. Partizani e mbylli sezonin e shkuar si kampion nën drejtimin Kolelës, i cili u largua pa shumë zhurmë nga ai post pa provuar shijen e Kupave të Europës, ndërsa për të kuqtë u tregua shumë koprrac në deklarata, madje duke thënë se nuk kishte ndjekur as miqësoren me Romën.
“Nuk e pashë as ndeshjen që luajti me Romën s’e nuk dija as ku ta shihja. Nuk kam parë asnjë ndeshje ende, me përjashtim të ndonjë pamjeje filmike. Preferoj t’i shoh ndeshjet më shumë drejtpërdrejtë sesa në TV”, deklaroi Xhovani Kolela.
Trajneri me origjinë nga Salermo ishte i pranishëm në stadiumin “Paolo Maza” dy ditë më parë për të ndjekur ndeshjen miqësore të luksit mes Egnatias dhe Interit.
