Rreth 10 mijë civilë janë konfirmuar të vrarë në Ukrainë që prej nisjes së luftës së Rusisë, në shkurt të 2022-shit. Kështu pretendon organizata e kombeve të bashkuara në një raport të ri për luftën.
Siç bëri të ditur komisioneri i lartë për drejtat e njeriut, Volker Turk janë regjistruar 9444 raste të vdekjes së civilëve në Ukrainë.
E megjithatë shifra reale besohet të jetë shumë më e lartë sepse ka shumë rajone për të cilat mungojnë të dhënat. Kjo vlen sidomos për qytetet si Mariupol, Lisishank e Severodonjtsks, të cilat pas bombardimeve të vazhdueshme dhe luftimeve të ashpra janë pushtuar nga trupat ruse.
Në Kiev ekziston frika, se në të vërtetë kanë humbur jetën disa dhjetëra mijëra ukrainas.
Sipas të dhënave të OKB-së, pjesa dërrmuese e atyre që humbën jetën, 7339 vetë, u vranë në ato pjesë të vendit që u bombarduan nga Rusia dhe që mbrohen nga ushtria ukrainase. Në pjesët e pushtuara nga Rusia kanë humbur jetën 2105 civilë.
Në zonat ku zhvillohen luftime të ashpra, Donjeck dhe Luhansk në lindje, nga të dyja palët janë shënuar shumë më tepër viktima, se në kryeqytetin Kiev apo Ukrainën Perëndimore.
