Policia e Sarandës ka reaguar për mediat pasi u raportua për të shtëna me armë zjarri dhe një të plagosur në lagjen nr.1 të qytetit bregdetar.
Sipas uniformave blu, nuk ka patur shkëmbim zjarri, por një person ka shkrepur aksidentalisht armë. Bëhet fjalë për 23-vjeçarin Klaudio Qendro nga Delvina.
Gjithashtu, sqarohet se nuk ka të plagosur, por autori ka braktisur menjëherë mjetin e tij tip “BMW” dhe është larguar me vrap. Kanë qenë prindërit e 23-vjeçarit të cilët kishin shkuar në spital për të kërkuar informacion për djalin e tyre dhe prandaj lindën dyshime se ai mund të kishte mbetur i plagosur.
Klaudio Qendro është me precedent penal, pasi është arrestuar në nëntor të vitit 2021 për “vjedhje me dhunë” të një dyqani dhe ka dalë nga burgu pak kohë më parë. Policia është vënë në kërkim të tij për ta arrestuar.
